கொழும்பில் இரு ஆண்களின் சடலங்கள் மீட்பு

கொழும்பில் இரண்டு வெவ்வேறு இடங்களில் இரண்டு ஆண்களின் சடலங்கள் கண்டெடுக்கப்பட்டுள்ளதாக பொலிஸார் தெரிவித்துள்ளனர்.

கிராண்ட்பாஸ் மற்றும் தெஹிவளை ஆகிய இடங்களில் இருந்து இந்த சடலங்கள் மீட்கப்பட்டுள்ளன.

முதல் சடலம் நேற்று மாலை (29) கிராண்ட்பாஸ், இங்குருகடே சந்திப்பில் கண்டெடுக்கப்பட்டது.

இறந்தவரின் அடையாளம் தெரியவில்லை என்று பொலிஸார் தெரிவித்தனர், ஆனால் உயிரிழந்தவர் 35 முதல் 40 வயதுக்குட்பட்ட ஆண் என தெரிவிக்கப்பட்டுள்ளது.

அந்த நபர் சுமார் 5 அடி 4 அங்குல உயரம் கொண்டவர் என்றும், கருப்பு ஷார்ட்ஸ் மற்றும் கருப்பு டி-சர்ட் அணிந்திருந்தார் என்றும் பொலிஸார் தெரிவித்தனர்.

மேலதிக பரிசோதனைக்காக சடலம் கொழும்பு தேசிய மருத்துவமனையின் பிணவறையில் வைக்கப்பட்டுள்ளது.

சம்பவம் குறித்து கிராண்ட்பாஸ் பொலிஸார் தொடர்ந்து விசாரணை நடத்தி வருகின்றனர்.

இதற்கிடையே, இரண்டாவது சடலம் நேற்று மாலை தெஹிவளை, சிறிவர்தன வீதியில் உள்ள ஒரு வீட்டிற்குள் கண்டெடுக்கப்பட்டது.

இறந்தவர் தெஹிவளையைச் சேர்ந்த 23 வயதுடைய ஆண் என்பது விசாரணைகளில் தெரியவந்துள்ளது.

சடலம் பிரேத பரிசோதனைக்காக களுபோவில மருத்துவமனையின் பிணவறையில் வைக்கப்பட்டுள்ளது.

தெஹிவளை பொலிஸார் மேலதிக விசாரணைகளை மேற்கொண்டு வருகின்றனர்.