அமெரிக்க தூதர்கள் பாகிஸ்தான் பயணம்: ஈரான் போர் நிறுத்தத்திற்கான புதிய முயற்சி
ஈரான் மற்றும் அமெரிக்கா இடையேயான போர் 57-வது நாளை எட்டியுள்ள நிலையில், பதற்றத்தைத் தணிக்கவும் அமைதியை ஏற்படுத்தவும் உலக நாடுகள் தீவிர முயற்சியில் இறங்கியுள்ளன.
இதன் ஒரு பகுதியாக, டொனால்ட் டிரம்ப்பின் சிறப்பு தூதர் ஸ்டீவ் விட்காஃப் மற்றும் மருமகன் ஜாரெட் குஷ்னர் ஆகியோர் ஈரானுடன் பேச்சுவார்த்தை நடத்துவதற்காக இன்று சனிக்கிழமை பாகிஸ்தான் செல்கின்றனர் என வெள்ளை மாளிகை அறிவித்துள்ளது.
ஈரானிய வெளியுறவு அமைச்சர் அப்பாஸ் அரக்சி ஏற்கனவே பாகிஸ்தான் தலைநகர் இஸ்லாமாபாத் வந்து சேர்ந்துள்ளார்.
எனினும், அமெரிக்க அதிகாரிகளுடன் தாங்கள் நேரடியாகப் பேச்சுவார்த்தை நடத்தப் போவதில்லை என்று ஈரான் திட்டவட்டமாகத் தெரிவித்துள்ளது.
பாகிஸ்தான் ஒரு பாலமாக மட்டுமே செயல்பட்டு, தங்களின் கருத்துக்களை அமெரிக்காவிற்குத் தெரிவிக்கும் என்றும் ஈரான் அரசு ஊடகம் செய்தி வெளியிட்டுள்ளது.
அமெரிக்க பாதுகாப்புத்துறை செயலாளர் பீட் ஹெக்செத் விடுத்துள்ள எச்சரிக்கையில், ஈரான் தனது அணு ஆயுதக் கனவைக் கைவிட்டால் மட்டுமே நல்லதொரு ஒப்பந்தத்தை எட்ட முடியும் என்று கூறியுள்ளார்.
அவ்வாறு இல்லையெனில், அமெரிக்காவின் கடுமையான கடற்படை முற்றுகையால் ஈரானின் பொருளாதாரம் முடங்கும் என்றும் அவர் குறிப்பிட்டுள்ளார்.
இதற்கிடையில், அமெரிக்கா தனது மூன்றாவது பெரிய விமானம் தாங்கிப் போர்க்கப்பலான ‘USS ஜார்ஜ் எச்.டபிள்யூ. புஷ்’ கப்பலை மத்திய கிழக்கு பகுதிக்கு அனுப்பியுள்ளது அப்பகுதியில் பெரும் பரபரப்பை ஏற்படுத்தியுள்ளது.
