பஹல்காம் தாக்குதல் – கடுமையான பதிலடி கொடுக்கடும் என பிரதமர் மோடி உறுதி

பஹல்காம் பயங்கரவாத தாக்குதலில் ஈடுபட்டவர்களுக்கும் இந்தத் தாக்குதலுக்கு சதித்திட்டம் தீட்டியவர்களுக்கும் கடுமையான பதிலடி
கொடுக்கடும் என இந்தியப் பிரதமர் நரேந்திர மோடி தெரிவித்துள்ளார்.

ஒவ்வொரு மாதமும் இறுதி ஞாயிறு அன்று அகில இந்திய வானொலி மூலம் மனதின் குரல் நிகழ்ச்சியில் இந்தியப் பிரதமர் நரேந்திர மோடி மக்களோடு கலந்துரையாடி வருகிறார். இன்றைய கலந்துரையாடலின்போதே அவர் இவ்வாறு தெரிவித்தார்.

இங்கு மேலும் கருத்து தெரிவித்த அவர்,

‘மனதின் குரல்’ நிகழ்ச்சியில் நான் உங்களுடன் பேசும்போது, ​​என் இதயத்தில் ஆழ்ந்த வேதனை ஏற்படுகிறது. ஏப்ரல் 22 ஆம் திகதி பஹல்காமில் நடந்த பயங்கரவாத சம்பவம் நாட்டின் ஒவ்வொரு குடிமகனையும் காயப்படுத்தியுள்ளது. பாதிக்கப்பட்ட குடும்பங்களுக்கு ஒவ்வொரு இந்தியரும் ஆழ்ந்த அனுதாபங்களை தெரிவித்துக் கொள்கிறோம்.

காஷ்மீரில் அமைதி திரும்பியது, பாடசாலைகள் மற்றும் கல்லூரிகளில் மகிழ்ச்சி நிறைந்திருந்தது. கட்டுமானப் பணிகள் முன்னெப்போதும் இல்லாத வேகத்தில் அதிகரித்தன, ஜனநாயகம் வலுவடைந்து வந்தது, சுற்றுலாப் பயணிகளின் எண்ணிக்கை சாதனை வீதத்தில் அதிகரித்து வந்தது, மக்களின் வருமானம் அதிகரித்து வந்தது, இளைஞர்களுக்கு புதிய வாய்ப்புகள் உருவாக்கப்பட்டு வந்தன.

ஆனால், நாட்டின் எதிரிகள், ஜம்மு காஷ்மீரின் எதிரிகள் அதனை விரும்பவில்லை. பயங்கரவாதத்திற்கு எதிரான இந்தப் போரில், நாட்டின் ஒற்றுமை, 140 கோடி இந்தியர்களின் ஒற்றுமை ஆகியவையே நமது மிகப்பெரிய பலம்.

பயங்கரவாத தாக்குதல் குறித்த புகைப்படங்களைப் பார்த்த பிறகு ஒவ்வொரு இந்தியரின் இரத்தமும் கொதிக்கிறது என்பதை என்னால் உணர முடிகிறது. பஹல்காமில் நடந்த இந்தத் தாக்குதல் பயங்கரவாதத்தை ஆதரிப்பவர்களின் விரக்தியைக் காட்டுகிறது. அவர்களின் கோழைத்தனத்தைக் காட்டுகிறது.

பயங்கரவாதிகளும் பயங்கரவாதத்தின் மூளையாக இருப்பவர்களும் காஷ்மீர் மீண்டும் அழிக்கப்பட வேண்டும் என்று விரும்புகிறார்கள், அதனால்தான் அவர்கள் இவ்வளவு பெரிய சதித்திட்டத்தை செயற்படுத்தி இருக்கிறார்கள்.

ஒரு தேசமாக நாம் வலுவான மன உறுதியை வெளிப்படுத்த வேண்டும். இன்று உலகம் பார்த்துக் கொண்டிருக்கிறது, இந்த பயங்கரவாத தாக்குதலுக்குப் பின்னர், முழு நாடும் ஒரே குரலில் பேசுகிறது.

உலகத் தலைவர்கள் பலர் என்னிடம் தொலைபேசியில் பேசினர், கடிதங்கள் எழுதியுள்ளனர், செய்திகளை அனுப்பியுள்ளனர். இந்த கொடூரமான பயங்கரவாதத் தாக்குதலை அனைவரும் கடுமையாகக் கண்டித்துள்ளனர்.

பயங்கரவாதத்திற்கு எதிரான நமது போராட்டத்தில் 1.4 பில்லியன் இந்தியர்களுடன் முழு உலகமும் நிற்கிறது. பாதிக்கப்பட்டவர்களின் குடும்பங்களுக்கு நீதி கிடைக்கும் என்று மீண்டும் ஒருமுறை உறுதியளிக்கிறேன்.

இந்தத் தாக்குதலுக்கு சதித்திட்டம் தீட்டியவர்கள் மற்றும் குற்றவாளிகள் கடுமையான பதிலடியை எதிர்கொள்வார்கள்” என பிரதமர் மோடி உறுதியளித்தார்.