மத்திய கிழக்கில் அதிகரிக்கும் மோதல் – மில்லியன் கணக்கான குழந்தைகளை பாதிக்கும் அபாயம்

அமெரிக்கா, இஸ்ரேல் மற்றும் ஈரான் ஆகிய நாடுகளுக்கிடையே தீவிரமடைந்து வரும் மோதல், மத்திய கிழக்கு பிராந்தியம் முழுவதும் வாழும் மில்லியன் கணக்கான சிறுவர்களுக்கு கடுமையான அச்சுறுத்தலை ஏற்படுத்தியுள்ளதாக ஐக்கிய நாடுகளின் சிறுவர் நிதியமான யுனிசெஃப் தெரிவித்துள்ளது.

சர்வதேச அளவில் கவனத்தை ஈர்த்துள்ள இந்த மோதல் காரணமாக, ஏற்கனவே நூற்றுக்கணக்கான குழந்தைகள் பாதிக்கப்பட்டுள்ளதாக அந்த அமைப்பு வெளியிட்டுள்ள புதிய அறிக்கையில் தெரியவந்துள்ளது.

கடந்த பெப்ரவரி 28 ஆம் திகதி முதல் இதுவரை நடைபெற்ற வன்முறைச் சம்பவங்களில் 1,100 க்கும் மேற்பட்ட சிறுவர்கள் உயிரிழந்துள்ளனர் அல்லது காயமடைந்துள்ளனர்.

பாதிக்கப்பட்ட நாடுகள் வாரியாகப் பார்க்கும்போது, ஈரானில் மட்டும் 200 குழந்தைகளும், லெபனானில் 91 குழந்தைகளும் இந்த வன்முறையால் பாதிக்கப்பட்டுள்ளதாக யுனிசெஃப் கூறியுள்ளது.

இஸ்ரேலில் நான்கு குழந்தைகளும், குவைத்தில் ஒரு குழந்தையும் இந்தப் பட்டியலில் உள்ளனர். மோதல் மேலும் தீவிரமடையும் நிலையில், இந்த எண்ணிக்கைகள் அதிகரிக்கும் என்ற அபாயமும் நிலவுவதாக யுனிசெஃப் எச்சரித்துள்ளது.

உயிரிழப்புகள் மற்றும் காயங்கள் மட்டுமின்றி, இந்த மோதல் மில்லியன் கணக்கான சிறுவர்களின் இயல்பு வாழ்க்கையை முற்றிலுமாகப் புரட்டிப் போட்டுள்ளது. தொடர் குண்டுத் தாக்குதல்கள் காரணமாக லட்சக்கணக்கான மக்கள் தங்கள் வீடுகளை விட்டு இடம்பெயர்ந்துள்ள நிலையில், எண்ணற்ற சிறுவர்களின் கல்வி பாதிப்படைந்துள்ளது.

இந்தச் சூழ்நிலையின் தீவிரத்தை உணர்த்தும் விதமாக, யுனிசெஃப் வெளியிட்டுள்ள அறிக்கையில், “குழந்தைகளின் உயிர்களைப் பறிப்பது, அவர்களை ஊனமுற்ற நிலைக்கு ஆளாக்குவது அல்லது குழந்தைகள் தங்கியிருக்கும் அத்தியாவசிய சேவைகளை அழிப்பதை எவ்வகையிலும் நியாயப்படுத்த முடியாது” என்று குறிப்பிட்டுள்ளது.

போர் மூலம் ஏற்படும் இந்த பாதிப்புகள் முழு சர்வதேச சமூகத்தின் கவனத்தையும் ஈர்க்க வேண்டிய ஒரு மனிதாபிமான சிக்கலாக மாறியுள்ளது.