ட்ரம்ப் – புடின் அவசரத் தொலைபேசி உரையாடல் ; உலக அரசியல் குறித்து முக்கிய முடிவுகள்

அமெரிக்க ஜனாதிபதி டொனால்ட் ட்ரம்பிற்கும் ரஷ்ய ஜனாதிபதி விளாடிமிர் புடினுக்கும் இடையில் இடம்பெற்ற மிக முக்கியமான தொலைபேசி உரையாடல் சர்வதேச அரசியல் அரங்கில் பெரும் அதிர்வலைகளை ஏற்படுத்தியுள்ளது.

உக்ரைன் மற்றும் மத்திய கிழக்கில் உக்கிரமடைந்துள்ள போர்ச் சூழல்களுக்கு மத்தியில், இரு வல்லரசுத் தலைவர்களும் நேரடியாகப் பேச்சுவார்த்தை நடத்தியுள்ளமை பூகோள அரசியலில் முக்கியத்துவம் பெற்றுள்ளது.

உக்ரைன் போர் மற்றும் ட்ரம்பின் வெளிப்படையான கருத்துக்கள்

இந்தத் தொலைபேசி உரையாடல் குறித்து ஊடகவியலாளர்களுக்குக் கருத்துத் தெரிவித்த அமெரிக்க ஜனாதிபதி டொனால்ட் ட்ரம்ப், உக்ரைன் விவகாரம் குறித்து விரிவாகப் பேசப்பட்டதாகக் குறிப்பிட்டார்.

“உக்ரைன் போர் என்பது ஒரு முடிவே இல்லாத யுத்தமாக (never-ending fight) மாறியுள்ளது. ஜனாதிபதி புடினுக்கும் உக்ரைன் ஜனாதிபதி ஜெலன்ஸ்கிக்கும் இடையில் பாரிய முரண்பாடுகளும் வெறுப்பும் காணப்படுகின்றன. அவர்கள் இருவரும் ஒன்றிணைவதற்கான சாத்தியங்கள் குறைவாகவே காணப்படுகின்றன.

இருப்பினும், உக்ரைன் விவகாரம் குறித்த இந்த உரையாடல் மிகவும் நேர்மறையானதாக (positive call) அமைந்தது” என ட்ரம்ப் தெரிவித்தார்.

மத்திய கிழக்கு விவகாரமும் ட்ரம்பின் நிபந்தனையும்

மத்திய கிழக்கில் ஈரான் மீது அமெரிக்கா முன்னெடுத்து வரும் இராணுவ நடவடிக்கைகள் குறித்தும் இரு தலைவர்களும் ஆழமாகக் கலந்தாலோசித்துள்ளனர். மத்திய கிழக்கு நெருக்கடியைத் தீர்ப்பதில் உதவிகரமாகச் செயற்பட (helpful) ரஷ்ய ஜனாதிபதி புடின் விருப்பம் வெளியிட்டதாக ட்ரம்ப் சுட்டிக்காட்டினார்.

இதற்குப் பதிலளித்த ட்ரம்ப், “நீங்கள் மத்திய கிழக்கில் உதவி செய்வதை விட, உக்ரைன் போரை விரைவாக முடிவுக்குக் கொண்டு வந்தால் அதுவே எனக்குச் செய்யும் மிகப்பெரிய உதவியாக அமையும்” எனப் புடினிடம் நேரடியாகத் தெரிவித்ததாகக் குறிப்பிட்டார்.

கிரெம்ளின் வெளியிட்ட அறிக்கை மற்றும் ரஷ்யாவின் நிலைப்பாடு

மறுபுறம், ரஷ்ய ஜனாதிபதியின் உத்தியோகபூர்வ செயலகமான கிரெம்ளின் (Kremlin) வெளியிட்டுள்ள அறிக்கையின்படி, இந்தத் தொலைபேசி அழைப்பானது அமெரிக்காவின் முன்முயற்சியிலேயே (initiated by the US) மேற்கொள்ளப்பட்டுள்ளது. சுமார் ஒரு மணித்தியாலம் நீடித்த இந்த உரையாடல் மிகவும் யதார்த்தமானதாகவும் ஆக்கபூர்வமானதாகவும் அமைந்ததாக ரஷ்யத் தரப்பு கூறியுள்ளது.

மத்திய கிழக்கு நெருக்கடியை இராஜதந்திர ரீதியில் விரைவாக முடிவுக்குக் கொண்டுவர வேண்டும் எனப் புடின் இந்த உரையாடலில் வலியுறுத்தியுள்ளார்.

இதேவேளை, ஈரானின் புதிய அதியுயர் தலைவராகப் பதவியேற்றுள்ள மொஜ்தபா கமேனிக்கு ரஷ்ய அதிபர் புடின் உத்தியோகபூர்வமாக வாழ்த்துத் தெரிவித்துள்ளதுடன், டெஹ்ரானுக்கான ரஷ்யாவின் முழுமையான ஆதரவையும் மீள உறுதிப்படுத்தியுள்ளார். இது அமெரிக்காவின் நிலைப்பாட்டிற்கு முற்றிலும் முரண்பட்ட ஒரு மாபெரும் இராஜதந்திர நகர்வாகப் பார்க்கப்படுகிறது.

உலகளாவிய எண்ணெய் சந்தை தொடர்பில் அவதானம்

மத்திய கிழக்கு மற்றும் ஐரோப்பியப் போர்ச் சூழல்களால் உலகளாவிய எண்ணெய் சந்தையில் (Global oil markets) ஏற்பட்டுள்ள பாரிய தளம்பல் நிலை, எரிபொருள் விலையேற்றம் மற்றும் வெனிசுலாவின் தற்போதைய அரசியல் நிலவரங்கள் குறித்தும் இரு வல்லரசுத் தலைவர்களும் தமது உரையாடலில் தீவிரமாக விவாதித்துள்ளமை குறிப்பிடத்தக்கது.