நேரடி தாக்குதலில் இறங்கியது அமெரிக்கா – ஈரானுக்கு அணு ஆயுதங்களை வழங்க தயாராகும் ரஷ்யா

ஈரானுக்கு நேரடியாக தங்கள் சொந்த அணு ஆயுதங்களை வழங்கத் தயாராக இருப்பதாக ரஷ்ய பாதுகாப்பு பேரவையிய்ன் துணைத் தலைவரும், முன்னாள் ஜனாதிபதியுமான டிமிட்ரி மெட்வெடேவ் தெரிவித்துள்ளார்.

அமெரிக்க ஜனாதிபதி டொனால்ட் டிரம்ப் நிர்வாகம் ஈரானிய அணுசக்தி நிலையங்கள் மீது தாக்குதல்களைத் தொடங்கிய பின்னர் ரஷ்யாவின் இந்த அறிவிப்பு வெளியாகியுள்ளது.

ஈரானிய அணுசக்தி நிலையங்கள் மீதான டிரம்ப் நிர்வாகத்தின் தாக்குதல்கள் அடுத்து என்ன நடக்கும் என்பதற்கு வழிவகுக்கும் என்று மெட்வெடேவ் சுட்டிக்காட்டியுள்ளார்.

“அணுசக்தி செறிவூட்டல் மற்றும் எதிர்கால அணு ஆயுதங்களின் உற்பத்தி தொடரும்” என்று அவர் கூறினார். “பல நாடுகள் ஈரானுக்கு நேரடியாக தங்கள் சொந்த அணு ஆயுதங்களை வழங்கத் தயாராக உள்ளன” என்றும் அவர் குறிப்பிட்டார்.

பாரசீக வளைகுடாவில் உள்ள ஃபோர்டோ, நடான்ஸ் மற்றும் இஸ்பஹானில் உள்ள மூன்று ஈரானிய அணுசக்தி நிலையங்கள் மீது அமெரிக்கா தாக்குதல்களை நடத்திய பின்னர் இந்த அறிவிப்பு வெளியாகியுள்ளது.

டிரம்ப் இந்த நடவடிக்கையை “மிகவும் வெற்றிகரமான தாக்குதல்” மற்றும் “பெரிய இராணுவ வெற்றி” என்று விவரித்தார், ஈரானின் முக்கிய அணுசக்தி செறிவூட்டல் நிலையம் “முற்றிலும் முழுமையாகவும் அழிக்கப்பட்டுவிட்டது” என்று கூறினார்.

இருப்பினும், ஈரானின் அணுசக்தி வலையமைப்பிற்கு எவ்வளவு சேதம் ஏற்பட்டுள்ளது என்பதை உறுதியாகக் கூற முடியாதுள்ளதாக நிபுணர்கள் தெரிவித்தனர்.

“மிட்நைட் ஹேமர்” என்ற குறியீட்டுப் பெயரிடப்பட்ட இந்த நடவடிக்கையின் ஆரம்ப மதிப்பீடுகள் “மூன்று தளங்களுக்கும் மிகவும் கடுமையான சேதத்தை” காட்டியதாக அமெரிக்க விமானப்படை ஜெனரல் டான் கேன் கூறினார்.

ஜூன் 13 முதல் இஸ்ரேலுக்கும் ஈரானுக்கும் இடையே தொடர்ச்சியான தாக்குதல்களுக்குப் பின்னர் டிரம்ப் நிர்வாகம் இந்த தாக்குதல் முடிவை எடுத்திருந்தது.

ஈரான் அணு ஆயுதத்தை உருவாக்கும் நிலைக்கு அருகில் இருப்பதாகக் கூறி, ஈரானின் அணுசக்தி நிலையங்களை குறிவைக்க இஸ்ரேல் அமெரிக்காவை அழைத்துள்ளது.

இருப்பினும், ஈரான் தனது அணுசக்தி திட்டம் இராணுவ நோக்கங்களுக்காக அல்ல, பொதுமக்களுக்காக என்று கூறுகிறது. அமெரிக்கா தனது தாக்குதல்களால் மோதலை தீவிரப்படுத்தியுள்ளதாக மெட்வெடேவ் குற்றம் சாட்டினார்.

“அமெரிக்கா இப்போது ஒரு புதிய மோதலில் சிக்கியுள்ளது, மேலும் தரைவழி நடவடிக்கைக்கான வாய்ப்பு அதிகரித்துள்ளதாக” அவர் சுட்டிக்காட்டியுள்ளார்.