அதிக விலைக்கு அரிசி விற்பனை – இலாபம் தேசிய மக்கள் சக்திக்கா என சந்தேகம்?

270 ரூபாய்க்கு அரிசியை விற்பனை செய்வதன் மூலம் பெறப்படும் அதிக இலாபம் தேசிய மக்கள் சக்தியின் வெற்றிக்காக செயற்பட்ட முதற்தர அரிசி ஆலை உரிமையாளர்களுக்குச் செல்கின்றதா என ஐக்கிய மக்கள் சக்தி சந்தேகிப்பதாக ஐக்கிய மக்கள் சக்தியின் கண்டி மாவட்ட அமைப்பாளர் மகேஷ் சேனாநாயக்க தெரிவித்தார்.

கொழும்பில் இடம்பெற்ற ஊடகவியலாளர் சந்திப்பின் போதே அவர் இவ்விடயத்தை தெரிவித்தார்.

இந்த காரணத்தினால் தற்போது அரிசி கிலோ ஒன்றை 230 ரூபாய்க்கு பெற்றுக் கொள்ள முடியாமல் போயுள்ளதாகவும் அவர் தெரிவித்தார்.

பிரதான எதிர்க்கட்சியாக ஐக்கிய மக்கள் சக்தி, பொதுமக்களின் பிரச்சினைகள் தொடர்பில் பேசுவதற்கு முதுகெலும்பைக் கொண்டுள்ளது, எனினும் அரசாங்கத்தால் அவ்வாறு செய்ய முடியவில்லை என்று அவர் கூறினார்.

கடந்த சிறுபோக மற்றும் பெரும்போக பருவங்களில் நெல் 80 முதல் 105 ரூபாய் வரை விலைக்கு வாங்கப்பட்டதாகவும், ஒரு கிலோ நெல்லில் இருந்து 600 கிராம் அரிசியை உற்பத்தி செய்ய முடியும் என்றும் அவர் கூறினார்.

ஒரு கிலோ அரிசியை உற்பத்தி செய்ய ஒன்றரை கிலோ நெல் தேவைப்படுவதாகவும், அதன்படி, 120 -125 ரூபாய் வரையில் ஒரு கிலோ அரிசியை உற்பத்தி செய்ய முடியும் என்றும் அவர் கூறினார்.

அதன்படி, மொத்த இலாபத்தின் பின்னர், ஒரு கிலோ அரிசியை 165 முதல் 170 ரூபாய் வரையிலான விலை வரம்பில் நுகர்வோருக்கு விற்க முடியும் என்று அவர் கூறினார்.

இதேவேளை, அரிசி ஆலை உரிமையாளர்கள் வங்கிகள் மூலம் 4 மற்றும் 5 வீத குறைந்த வட்டி விகிதத்தில் பெரிய கடன்களைப் பெறுவதாகவும், அவர்கள் அதிலிருந்து அரிசியை வாங்குகிறார்களா என்பதைக் கண்டறிய எந்த வழியும் இல்லை என்றும் அவர் தெரிவித்தார்.

மேலும், தற்போதைய அரசாங்கம் பெரிய அளவிலான நெல் ஆலை உரிமையாளர்களுக்கு அரச வங்கிகள் மூலம் அதிக வட்டி கடன்களை வழங்க நடவடிக்கை எடுத்து வருவதாகவும் அவர் தெரிவித்தார்.