பண்டிகை காலத்தை முன்னிட்டு நாடு முழுவதும் பலத்த பாதுகாப்பு

பண்டிகை காலத்தை முன்னிட்டு நாடு முழுவதும் பாதுகாப்பு பலப்படுத்தப்பட்டுள்ளதாக பொலிஸார் தெரிவித்துள்ளனர்.

இதன்படி, முக்கிய நகரங்கள், வழிபாட்டு தலங்கள், முன்னணி ஹோட்டல்கள் மற்றும் சுற்றுலாப் பகுதிகள் முழுவதும் மேம்பட்ட பாதுகாப்புத் திட்டம் செயல்படுத்தப்பட்டுள்ளதாக அறிவிக்கப்பட்டுள்ளது.

மேலும், மக்கள் கூட்டம் இருக்கும் என்று எதிர்பார்க்கப்படும் வணிக வளாகங்கள் மற்றும் பொது சதுக்கங்கள் உட்பட, அதிக போக்குவரத்து நெரிசல் உள்ள நகர்ப்புறங்களில் பாதுகாப்பை வலுப்படுத்த உத்தரவிடப்பட்டுள்ளது.

மேல் மாகாணத்தில் மட்டும், சட்டம் ஒழுங்கைப் பராமரிக்க கூடுதலாக 2,500 பொலிஸ் அதிகாரிகள் பணியில் ஈடுபடுத்தப்பட்டுள்ளனர்.

பாதுகாப்பு நடவடிக்கைகளுக்கு சிறப்பு அதிரடிப்படை மற்றும் முப்படைகளும் களமிறக்கப்பட்டுள்ளது.

மேலும், குற்றச் செயல்களைக் கண்காணிக்கவும் தடுக்கவும் பரபரப்பான வணிக மையங்களுக்கு அருகில் புலனாய்வு அதிகாரிகள் மற்றும் சாதாரண உடையில் பொலிஸார் நிறுத்தப்பட்டுள்ளனர்.

கிறிஸ்துமஸ் பண்டிகையை முன்னிட்டு கிறிஸ்தவ தேவாலயங்களுக்கு சிறப்பு பாதுகாப்பு வழங்கப்பட்டுள்ளது.

பக்தர்களின் பாதுகாப்பை உறுதி செய்வதற்காக மதத் தலைவர்கள் மற்றும் அமைப்பாளர்களுடன் பொலிஸார் ஒருங்கிணைந்து பணியாற்றி வருகின்றனர்.

பண்டிகைக் காலத்தில் பாதுகாப்பைப் பேணுவதற்கு பொதுமக்களின் ஒத்துழைப்பு அவசியம் என்பதையும் பொலிஸார் வலியுறுத்தியுள்ளனர்.

இதன்படி, சந்தேகத்திற்கிடமான நபர்கள், குழுக்கள், வாகனங்கள் அல்லது செயல்பாடுகள் குறித்து அறிவிக்குமாறு பொதுமக்கள் வலியுறுத்தப்பட்டுள்ளனர்.

விடுமுறை நாட்களில் பொதுவாக அதிகரிக்கும் கவனக்குறைவான வாகனம் ஓட்டுதல் மற்றும் போக்குவரத்து தொடர்பான குற்றங்களை குறிவைத்து பொலிஸார் சிறப்பு நடவடிக்கைகளைத் தொடங்கியுள்ளனர்.

இந்நிலையில், தேவைப்படும் நேரத்தில் பொலிஸாருக்கு  உதவ இராணுவம் தயார் நிலையில் இருப்பதாக இராணுவப் பேச்சாளர் பிரிகேடியர் வருண கமகே தெரிவித்துள்ளார்.

இதேவேளை, பண்டிகைக் காலம் முழுவதும் பொதுமக்களின் பாதுகாப்பை உறுதி செய்வதற்காக இராணுவத் தலைமையகத்தில் ஒரு சிறப்பு செயல்பாட்டு அறை நிறுவப்பட்டுள்ளமையும் குறிப்பிடத்தக்கது.