அமெரிக்காவுடன் மேலும் பேச்சுவார்த்தை நடத்தப்படும் – நிதி அமைச்சின் செயலாளர்

அமெரிக்காவுடனான பரஸ்பர வரி பேச்சுவார்த்தைகளின் வெற்றியின் அடிப்படையில் மேலும் பேச்சுவார்த்தைகள் நடத்தப்படும் என்று எதிர்பார்க்கப்படுவதாக நிதி அமைச்சின் செயலாளர் ஹர்ஷன சூரியபெரும தெரிவித்துள்ளார்.

அரசாங்க தகவல் திணைக்களத்தில் நடைபெற்ற ஊடகவியலாளர் சந்திப்பில் அவர் இதனை குறிப்பிட்டுள்ளார்.

அமெரிக்காவுடனான பேச்சுவார்த்தைகள் மூலம் இலங்கை எதிர்பார்த்த வகையிலான வரி நிவாரணத்தைப் பெற முடிந்தது என்று அவர் சுட்டிக்காட்டியுள்ளார்.

இதன் மூலம் பிராந்தியத்தில் உள்ள மற்ற போட்டியாளர்களுடன் ஒப்பிடக்கூடிய வரி விகிதத்தை அடைய முடிந்தது என்றும், இது இலங்கையில் தங்கள் சந்தைப் பங்கைத் தக்க வைத்துக் கொள்ள உதவும் என்றும் அவர் கூறினார்.

இதனிடையே, மேலும் கட்டணக் குறைப்புகளைப் பெறும் நம்பிக்கையில், அரசாங்கம் அமெரிக்காவுடன் தொடர்ந்து பேச்சுவார்த்தையில் ஈடுபடும் என்று அவர் மேலும் தெரிவித்துள்ளார்.