கிளீன் ஸ்ரீலங்கா திட்டத்துடன் பாடசாலைகளில் ஐந்து ஆண்டுகால விசேட உணவுத்திட்டம் – முக்கிய பரிந்துரை

இலங்கையில் நடைமுறைப்படுத்தப்படவுள்ள “கிளீன் ஸ்ரீலங்கா” திட்டத்தில் 100 ரயில் நிலையங்களை மேம்படுத்தும் புதிய முயற்சியை வரவேற்கும் அதேவேளையில், சமூக சேவைகளுக்கு அடுத்த படியாக பாடசாலைகளில் உணவுத்திட்டத்தை இணைக்க வேண்டும் என்று முன்னாள் ஐக்கியநாடுகள் உலக உணவுத்திட்டத்தின் இலங்கைக்கான செயற்பாட்டு முகாமையாளர் இரவி ஆனந்தராஜா பரிந்துரைத்துள்ளார்.

2003-2009 காலகட்டத்தில், இலங்கை அரசின் புனர்வாழ்வு மற்றும் தேசிய அபிவிருத்தி அமைச்சு, ஐக்கிய நாடுகள் உலக உணவுத்திட்டத்துடன் இணைந்து, 15 மாவட்டங்களில் 1,600 பாடசாலைகளில் 400,000 மாணவர்களுக்கு காலை, மதிய உணவு வழங்கப்பட்டதன் மூலம் கல்வி மற்றும் ஆரோக்கியத்தில் வியத்தகு மாற்றங்கள் ஏற்பட்டன.

இதுபோன்ற திட்டம் மாணவர்களின் தற்காலிக பசியை பாடசாலை நேரங்களில் நீக்குவதுடன், பாடசாலை வருகையை அதிகரிக்கின்றது. மேலும், இது மாணவர்களின் உடல்நலத்தை மேம்படுத்துவதுடன், அறிவுத்திறனையும் உயர்த்துகிறது.

இத்தகைய மாற்றங்கள் மாணவர்களின் கல்வி முடிவுகளில் சிறப்பாக பிரதிபலிக்கின்றன, அதனுடன் மனித வளத்தை மேம்படுத்துவதற்கான வாய்ப்புகளை உருவாக்குகின்றன.

இத்திட்டம், அரசாங்கத்திற்கு நீடித்த பயன்களை வழங்குவதால், சமூக ஆரோக்கியத்திற்கும் பொருளாதாரத்திற்கும் மாபெரும் உதவியாக இருக்கும்.

2022 பொருளாதார நெருக்கடியின் பின்னர், இத்திட்டம் மீண்டும் அவசியமானது என இரவி ஆனந்தராஜா வலியுறுத்தியுள்ளார்.

அத்துடன், சர்வதேச அமைப்புகள் மற்றும் ஐக்கிய நாடுகள் நிறுவனங்களின் உதவியுடன், குறைந்தபட்சம் ஐந்து ஆண்டுகளுக்கு இந்த திட்டத்தை செயல்படுத்த அரசு நடவடிக்கை எடுக்க முடியும்.

இவ்வாறு உதவி வழங்கப்பட்டால் அதன்மூலம், இத்திட்டத்திற்கான அரச செலவினங்களில் ஐந்து வீதம் வரை சேமிக்கலாம் என்றும், ஆனால் மாணவர்களின் வளமான எதிர்காலத்திற்கான அடிப்படை ஏற்படும் என்றும் அவர் குறிப்பிட்டார்.

இந்த பரிந்துரையை மத்திய மற்றும் மாகாண அரசுகளின் கவனத்துக்கு கொண்டு சென்று, அரசு விரைவாக செயல்பட வேண்டும் என்று அவர் சுட்டிக்காட்டுகிறார்.