தனியார் துறையின் மருத்துவ பிரச்சினைகளுக்கு என்ன தீர்வு? சுகாதார அமைச்சரிடம் அறிக்கை கையளிப்பு

மருந்தாளுநர்களின் பற்றாக்குறை உட்பட நாட்டில் தனியார் துறை மருந்தகங்கள் தற்போது எதிர்கொள்ளும் ஏராளமான பிரச்சினைகளுக்கு தீர்வு காண நியமிக்கப்பட்ட ஐந்து பேர் கொண்ட குழுவின் அறிக்கை குழுவின் தலைவர் பேராசிரியர் இந்திக கருணாதிலக்க மற்றும் சுகாதார மற்றும் ஊடக அமைச்சின் குழு பிரதிநிதிகளால் சமீபத்தில் சுகாதார மற்றும் ஊடக அமைச்சர் டாக்டர் நளிந்த ஜயதிஸ்ஸவிடம் ஒப்படைக்கப்பட்டது.

தனியார் துறை மருந்தகங்களில் மருந்தாளுநர் பற்றாக்குறை இருப்பதாகவும், அந்தத் துறையை நேரடியாகப் பாதிக்கும் ஏராளமான பிரச்சினைகள் இருப்பதாகவும் சுகாதார மற்றும் வெகுஜன ஊடக அமைச்சர் டாக்டர் நளிந்த ஜயதிஸ்ஸவிடம் வந்த அறிக்கைகளைத் தொடர்ந்து, இந்த விவகாரத்தை ஆராய்ந்து பொருத்தமான பரிந்துரைகளுடன் அறிக்கை சமர்ப்பிக்குமாறு சுகாதார மற்றும் வெகுஜன ஊடக அமைச்சின் செயலாளர் டாக்டர் அனில் ஜாசிங்கவிடம் அமைச்சர் முன்னர் அறிவுறுத்தியுள்ளார்.

அதன்படி, அமைச்சின் செயலாளர் இந்த ஐந்து பேர் கொண்ட சிறப்புக் குழுவை நியமித்தார். கொழும்பு பல்கலைக்கழகத்தின் மருத்துவக் கல்வித் துறையின் பேராசிரியர் இந்திக கருணாதிலக தலைமையிலான ஐந்து பேர் கொண்ட குழுவின் மற்ற உறுப்பினர்களாக, உலக சுகாதார அமைப்பின் இலங்கைக்கான அலுவலகத்தின் அத்தியாவசிய மருந்துகள் தொடர்பான தேசிய ஆலோசகர் டாக்டர் சிந்தா அபேவர்தன, தேசிய தொற்று நோய்கள் நிறுவனத்தின் நிபுணர் டாக்டர் சுரங்க மணில்கம, தேசிய இரத்த மாற்று மையத்தின் இயக்குநர் டாக்டர் லக்ஷ்மன் எதிரிசிங்க மற்றும் தேசிய மருந்துக் கூட்டுத்தாபனத்தின் உறுப்பினர் டாக்டர் சந்தன அத்தபத்து ஆகியோரை நியமிக்க நடவடிக்கை எடுக்கப்பட்டது.

இந்த ஐந்து பேர் கொண்ட குழு, பல்வேறு அம்சங்களில் இருந்து விஷயங்களை பகுப்பாய்வு செய்து, குறுகிய கால, நடுத்தர கால மற்றும் நீண்ட கால பரிந்துரைகள் உட்பட இந்த அறிக்கையைத் தொகுத்துள்ளது.

மருந்தாளுநர்களின் தற்போதைய பற்றாக்குறையை மதிப்பிடுதல் மற்றும் தரவுகளை பகுப்பாய்வு செய்தல், அத்தகைய பற்றாக்குறைக்கான மூல காரணங்களைக் கண்டறிந்து எதிர்காலத் தேவைகளை முன்னறிவித்தல், மருந்தாளுநர்களின் பற்றாக்குறையை நிவர்த்தி செய்வதற்கான அவசர பரிந்துரைகளை வழங்குதல், மருந்தாளுநர்களின் நடைமுறைத் தேவைகளை நிவர்த்தி செய்யும் போது ஒழுங்குமுறைத் தேவைகளைப் பூர்த்தி செய்வதில் பயிற்சித் திட்டங்களின் போதுமான தன்மையை மதிப்பிடுதல், பயிற்சிகளை மேம்படுத்துதல், மருந்தாளுநர்களின் கல்வி மற்றும் பயிற்சிக்கான சர்வதேச தரங்களை வழங்குதல் போன்ற பல அடிப்படை பரிந்துரைகளை இந்த அறிக்கை உள்ளடக்கியது. இந்த அறிக்கையில் குறுகிய கால, நடுத்தர கால மற்றும் நீண்டகால பரிந்துரைகளும் உள்ளடக்கப்பட்டுள்ளன என்பது குறிப்பிடத்தக்கது.

இந்த அறிக்கையின் பரிந்துரைகளை செயற்படுத்துவன் மூலம் தனியார் துறையில் மருந்தாளுநர்களின் பற்றாக்குறை மற்றும் அந்தத் துறையில் நிலவும் பிரச்சினைகளை நிவர்த்தி செய்வதற்கும், அந்தத் துறையிலும் வினைத்திறனான சேவையை உருவாக்குவதற்கும் தேவையான நடவடிக்கைகள் எடுக்கப்படும் என்று சுகாதார மற்றும் வெகுஜன ஊடக அமைச்சர் டாக்டர் நளிந்த ஜயதிஸ்ஸ தெரிவித்தார்.

சுகாதாரம் மற்றும் வெகுஜன ஊடக பிரதி அமைச்சர் டாக்டர் ஹன்சக விஜேமுனி உட்பட இந்த ஐந்து பேர் கொண்ட குழுவின் உறுப்பினர்களும் இந்த நிகழ்வில் கலந்து கொண்டனர்.