தொடரூந்து விபத்தில் குழந்தை உட்பட மூவர் காயம்! வவுனியாவில் சம்பவம்

வவுனியாவில் இடம்பெற்ற தொடரூந்து விபத்தில் நான்குவயது குழந்தை உட்பட மூவர் காயமடைந்த நிலையில் வவுனியா வைத்தியசாலையில் அனுமதிக்கப்பட்டுள்ளனர்.

குறித்த விபத்து நேற்று மாலை இடம்பெற்றது. விபத்து தொடர்பாக மேலும் தெரியவருகையில்….

கொழும்பில் இருந்து யாழ் நோக்கி பயணித்த தொடரூந்து நேற்று மாலை வவுனியா பிரதான புகையிரதநிலையத்தை அடைந்ததுடன், அங்கிருந்து புறப்பட்டு யாழ் நோக்கி பயணித்தது.

இதன்போது வவுனியா மன்னார் பிரதான வீதியில் உள்ள பாதுகாப்பான தொடரூந்து கடவையில் சென்றுகொண்டிருந்த போது வீதியால் பயணித்த பட்டா வாகனத்தை மோதித்தள்ளியது.

வாகனத்தில் பயணித்த கணவன், மனைவி மற்றும் அவர்களது நான்குவயது குழந்தை ஆகியோர், காயமடைந்த நிலையில் வவுனியா வைத்தியசாலையில் அனுமதிக்கப்பட்டனர்.

அவர்கள் பயணித்த வாகனம் கடும் சேதத்திற்குள்ளாகியது.

குறித்த விபத்து தொடரூந்து சமிஞ்சையில் ஏற்ப்பட்ட கோளாறு காரணமாக இடம்பெற்றிருக்கலாம் என தெரிவிக்கப்படுகின்றது.

இதேவேளை விபத்து இடம்பெற்ற கடவையில் ஊழியர் ஒருவர் 24 மணிநேரங்களும் பணியில் அமர்த்தப்பட்டுள்ளார்.

வழமையாக அந்த கடவையூடாக தொடரூந்து செல்லும் போது மூடப்படுகின்ற பாதுகாப்புக்கதவு நேற்று மூடப்படாமையினால் இவ் அசம்பாவிதம் ஏற்பட்டுள்ளது.

இவ்விபத்தினால் அரைமணிநேர தாமதத்திற்கு பின்னரே தொடரூந்து தனது பயணத்தை ஆரம்பித்தது.

சம்பவ இடத்திற்கு சென்ற வவுனியா பொலிஸார் விசாரணைகளை முன்னெடுத்து வருகின்றனர்.