இலங்கையில் ஆண் மக்கள்தொகை எண்ணிக்கையில் வீழ்ச்சி – பேராசியர் விடுத்துள்ள எச்சரிக்கை

இலங்கையில் ஆண் மக்கள்தொகை எண்ணிக்கையில் வீழ்ச்சி ஏற்படுவது எதிர்காலத்தில் பல நெருக்கடிகளை உருவாக்கும் என்று வடமேற்கு பல்கலைக்கழகத்தின் மூத்த பேராசிரியர் அமிந்த மெத்சில பெரேரா தெரிவித்துள்ளார்.

1995 ஆம் ஆண்டில், 100 பெண்களுக்கு 100.2 ஆண்கள் இருந்தனர் எனவும் தற்போது அந்த எண்ணிக்கை 100 பெண்களுக்கு 93.7 ஆண்களாகக் குறைந்துள்ளதாகவும் அவர் சுட்டிக்காட்டுகிறார்.

பெண்களின் ஆயுட்காலம் அதிகரிப்பு, பெண் பிறப்பு அதிகரிப்பு மற்றும் இளம் ஆண்களின் இடம்பெயர்வு ஆகியவை இந்த நிலைக்கு வழிவகுத்ததாக மூத்த பேராசிரியர் குறிப்பிட்டுள்ளார்.

இது குறித்து தொடர்ந்தும் கருத்து வெளியிட்ட அவர்,

“பல்கலைக்கழகங்கள் அல்லது கல்வி நிறுவனங்களில், பொறியியல் மற்றும் தொழில்நுட்பம் போன்ற ஒன்று அல்லது இரண்டு முக்கிய பட்டங்களைத் தவிர, அனைத்து துறைகளிலும் பெண்களின் சதவீதத்தில் குறிப்பிடத்தக்க அதிகரிப்பை நாங்கள் காண்கிறோம்,

மேலும் அதிக எண்ணிக்கையிலான பெண்கள் பணியிடங்களில் சேரும் போக்கும் உருவாகியுள்ளது. பெண்களும் ஆண்களும் சமநிலையில் இல்லாவிட்டால், பல சாத்தியமான விளைவுகளை ஏற்படுத்துகிறது.

இது பணியாளர்களையும் அதன் உற்பத்தித்திறனையும் எவ்வாறு பாதிக்கிறது என்பதை நாம் பார்க்க வேண்டும். ஆண்களுக்கு மட்டுமே வரையறுக்கப்பட்ட பல வேலைகள் உள்ளன.

அந்த வேலைகளைச் செய்ய போதுமான ஆண் மக்கள் தொகை இல்லையென்றால், நாம் ஒரு பெரிய நெருக்கடியை எதிர்கொள்ள நேரிடும்.” எனவே அரசாங்கம் இதனால் ஏற்படும் ஆபத்துகளை கவனத்தில்கொள்ள வேண்டும் என பேராசிரியர் வலியுறுத்தியுள்ளார்.

“பெண்களுக்கு போதுமான ஆண்கள் இல்லையென்றால், அவர்கள் ஒரே இடத்தில் நிச்சயதார்த்தம் செய்யும்போது, நெருக்கடியை சந்திப்பார்கள். காரணம், இந்தியா போன்ற ஒரு நாட்டில், திறமையான பின்னணியைக் கொண்ட அழகான மற்றும் பணக்கார பெண்கள் ஒரு ஆணை எளிதாகக் கண்டுபிடிப்பார்கள்.

ஆனால் கிராமப்புறங்களில், ஏழைப் பெண்களுக்கு ஒரு ஆணை கண்டுபிடிப்பது கடினமாக இருக்கலாம். இது நாட்டை எவ்வாறு பாதிக்கும், இதற்கு என்ன தீர்வுகளை வழங்க முடியும் என்பதற்கு அரசாங்கம் விரைவில் ஒரு தீர்வைக் கண்டுபிடிக்க வேண்டும்.

இந்த விவகாரம் வரும் தலைமுறைகளைப் பாதிக்கும் என்பதால் சிறந்த தீர்வைக் கண்டுபிடிப்பது பொருத்தமானது.” என அவர் மேலும் தெரிவித்துள்ளார்.