பங்களாதேஷ் கிரிக்கெட்: ஷகிப், மஷ்ரஃபே மீண்டும் விளையாட புதிய அரசு ஆதரவு

பங்களாதேஷில் அண்மையில் நடைபெற்ற பொதுத்தேர்தலில் பங்களாதேஷ் தேசியவாத கட்சி (BNP) வெற்றி பெற்று ஆட்சியைப் பிடித்துள்ள நிலையில், புதிய விளையாட்டுத் துறை அமைச்சராக முன்னாள் கால்பந்து அணித் தலைவர் அமினுல் ஹக் நியமிக்கப்பட்டுள்ளார். பதவியேற்ற பின் செய்தியாளர்களிடம் பேசிய அவர், முன்னாள் அவாமி லீக் நாடாளுமன்ற உறுப்பினர்களான ஷகிப் அல் ஹசன் மற்றும் மஷ்ரஃபே மோர்டசா ஆகியோர் மீதான வழக்குகளை அரசாங்கம் விரைவாகப் பரிசீலித்து, அவர்கள் மீண்டும் கிரிக்கெட் களத்திற்குத் திரும்புவதை உறுதி செய்யும் என்று தெரிவித்தார். கடந்த 2024-ஆம் ஆண்டு ஆட்சி மாற்றத்தின் போது இவர்கள் மீது சுமத்தப்பட்ட வழக்குகள் குறித்துப் புதிய அரசாங்கம் நெகிழ்வுத்தன்மையுடனும், சகிப்புத்தன்மையுடனும் நடந்து கொள்ளும் என்றும், அவர்கள் இருவரும் பங்களாதேஷ் கிரிக்கெட்டிற்குத் திரும்புவதையே தாங்கள் விரும்புவதாகவும் அவர் குறிப்பிட்டார்.

அமெரிக்காவில் வசித்துவரும் ஷகிப் அல் ஹசன், தான் சர்வதேச கிரிக்கெட்டிலிருந்து இன்னும் முழுமையாக ஓய்வு பெறவில்லை என்றும், பங்களாதேஷ் திரும்பி ஒரு முழுமையான தொடரில் விளையாடிவிட்டு கௌரவமாக ஓய்வு பெற விரும்புவதாகவும் ஏற்கனவே தெரிவித்திருந்தார். அதேவேளை, கடந்த ஆகஸ்ட் மாதம் முதல் தலைமறைவாக உள்ள மஷ்ரஃபே மோர்டசாவின் நிலையும் இந்த அறிவிப்பின் மூலம் சீராகும் என எதிர்பார்க்கப்படுகிறது. மேலும், கடந்த ஆண்டு நடைபெற்ற பங்களாதேஷ் கிரிக்கெட் வாரியத் (BCB) தேர்தல் முறையற்றது எனக் குறிப்பிட்ட அமைச்சர் அமினுல் ஹக், இது குறித்து அதிகாரிகளுடன் கலந்துரையாடி சீர்திருத்தங்களை மேற்கொள்ளவுள்ளதாகவும் தெரிவித்துள்ளார்.