உயிரைக் காப்பாற்றிக்கொள்ள ஆற்றில் குதித்த ஆறு பிள்ளைகளின் தந்தை உயிரிழப்பு

யானையின் தாக்குதலிலிருந்து உயிரைக் காப்பாற்றிக்கொள்ள ஆற்றில் குதித்த குடும்பஸ்தரொருவர் நீரில்மூழ்கி உயிரிழந்த சம்பவம் மட்டக்களப்பு கரடியனாறு பொலிஸ் பிரிவிலுள்ள மயிலவெட்டுவான் வீரகட்டு பகுதியில் ஞாயிற்றுக்கிழமை மாலை (05) இடம்பெற்றுள்ளது.

இச்சம்பவத்தில் மட்டக்களப்பு மயிலவெட்டுவான் உப்போடை வீதியைச் சேர்ந்த ஆறு பிள்ளைகளின் தந்தையான 50 வயதுடைய கணபதிப்பிள்ளை கருணாகரன் என்பவரே உயிரிழந்துள்ளதாக குடும்பத்தினர் பொலஸாருக்கு அடையாளம் காட்டியுள்ளனர்.

சம்பவ தினத்தில் காலை தனது 14 வயதுடைய மகனுடன் விறகு வெட்டுவதற்காக தோணியில் விரகட்டுமுனை பகுதிக்குச் சென்று விறகு வெட்டி வரும் வழியில் காட்டு யானை துரத்தியுள்ளது யானை தாக்குதலுக்குப் பயந்து தகப்பனும் மகனும் ஆற்றில் பாய்ந்;துள்ளனர். மகன் நீந்தி ஆற்றைக் கடந்த நிலையில் தகப்பனை ஆற்றில் நீர் அடித்துச் சென்றுள்ளது.

பிரதேச மக்கள் பல மணிநேரம் ஆற்றில் தேடிய நிலையில் மாலை வேளை சடலமாக மீடக்கப்பட்டார்.

ஏறாவூர்  திடீர் மரண விசாரணை அதிகாரி எம்.எஸ்.எம். நசீர் கரடியனாறு பொலிஸாருடன் சம்பவ இடத்திற்குச் சென்று  சடலத்தை பார்வையிட்டு முதற்கட்ட விசாரணையில் விசாரணைகளை முன்னெடுத்தார்.

கரடியனாறு பொலிஸார் மேலதிக விசாரணைகளை மேற்கொண்டு வருவதுடன், சடலம் தற்போது மட்டக்களப்பு போதனா வைத்தியசாலையில் உடல் கூறு பரிசோதனைக்காக ஒப்படைக்கப்பட்டுள்ளது.

மட்டக்களப்பு ஏறாவூர்ப்பற்று பிரதேசத்தில் காட்டு யானைகளின் தாக்குதலினால் பலர் கொல்லப்பட்டதுடன் வேளாண்மை உட்பட பல சொத்துக்களுக்கு சேதம் ஏற்படுத்தியுள்ளது. கடந்த ஓரிரு தினங்களாக சித்தாண்டி மற்றும் வந்தாறுமூலை கிராமங்களுக்குள் காட்டு யானைகள் புகுந்து மரங்களை சேதப்படுத்திய சம்பவங்களும் நடைபெற்றுள்ளன.

குறித்த பகுதிகளிலுள்ள யானை வேலிகள் சேதமடைந்து காணப்படுவதனால் யானைகள் இலகுவாக கிராமங்களுக்குள் நுழைகின்றன. இது தொடர்பாக பொதுமக்கள் உரிய அதிகாரிகளிடம் பலமுறை முறயிட்ட போதிலும் இதுவரை ஆக்கபூர்வதான நடவடிக்கையெடுக்கவில்லை என பிரதேச மக்கள் கவலை வெளியிட்டுள்ளனர்.

மாலை வேளையில் காட்டிலிருந்து வெளியாகும் யானைகள் காலையிலேயே மீண்டும் செல்கின்றன. இதனால் தமது வயல்களுக்கு செல்பவர்ககள் உயிர் அபாயத்துக்கு மத்திலேயே செல்லும் நிலை ஏற்பட்டுள்ளது. இவ்விடயம் தொடர்பாக உரிய அதிகாரிகள் கவனம் செலுத்தி காட்டு யானைகள் ஊருக்குள் வருவதை கட்டுபடுத்த நிலையான தீர்வொன்றை பெற்றுத்தருமாறு பிரதேச மக்கள் கோரிக்கை முன்வைத்துள்ளனர்.