கொழும்பில் பாதிக்கப்பட்ட மக்களை நேரில் சென்று சந்தித்த பிரதமர்

கொழும்பில் டிட்வா சூறாவளி கடுமையான வெள்ளப்பெருக்கை ஏற்படுத்தியதைத் தொடர்நது பிரதமர் கலாநிதி ஹரிணி அமரசூரிய இன்று (29) பிற்பகல் பாதிக்கப்பட்ட மக்களைச் சந்தித்துள்ளார்.

போமிரியா மற்றும் அதனை அண்மித்த பகுதிகளில் வெள்ளத்தால் பாதிக்கப்பட்ட மக்களைச் சந்தித்து அவர்களின் நிலைமை குறித்தும் மதிப்பாய்வு செய்தார்.

இடம்பெயர்ந்த குடும்பங்கள் தற்காலிகமாக தங்க வைக்கப்பட்டுள்ள போமிரியா கனிஷ்ட வித்தியாலயத்தில் , பிரதமர் பாதிக்கப்பட்ட மக்களைச் சந்தித்து அவர்களின் நலனை விசாரித்தார்.

உணவு மற்றும் சுகாதாரப் பொருட்கள் உட்பட இடம்பெயர்ந்தவர்கள் தற்போது எதிர்கொள்ளும் பற்றாக்குறைகள் குறித்தும் அவர் ஆய்வு செய்தார்.

மேலும் இந்தத் தேவைகள் விரைவாக பூர்த்தி செய்யப்படுவதை உறுதி செய்வதற்கான அரசாங்கத்தின் நிவாரண நடவடிக்கைகளை மதிப்பாய்வு செய்தார்.

அத்துடன் இடம்பெயர்ந்த சமூகங்களுக்கு நிவாரணம் மற்றும் பாதுகாப்பை வழங்க அயராது பாடுபடும் அனைவருக்கும் நன்றி தெரிவித்தார்.

இடம்பெயர்ந்த மற்றும் பேரிடர்களால் பாதிக்கப்பட்ட மக்களின் தேவைகளை உடனடியாகக் கண்டறிந்து வழங்குமாறும் அதிகாரிகளை அவர் வலியுறுத்தினார்.

தற்போது, ​​வெள்ளத்தால் இடம்பெயர்ந்த சுமார் 100 குடும்பங்கள், சுமார் 320 நபர்கள் போமிரியா கனிஷ்ட வித்தியாலயத்தில் தங்க வைக்கப்பட்டுள்ளனர்.

இதேவேளை, பிரதமர் கொலன்னாவைக்கு விஜயம் மேற்கொண்டு அங்குள்ள பேரிடர் நிலைமையை ஆய்வு செய்தார்.