வடக்கு இஸ்ரேலில் உள்ள இராணுவத் தளங்கள் மற்றும் குடியிருப்புகளைக் குறிவைத்து கடந்த திங்கட்கிழமை தொடங்கப்பட்ட தொடர்ச்சியான பெரும் எதிர்த்தாக்குதல்களின் போது, ​​இந்த அதிநவீன வான்வழி ஆயுதம் பயன்படுத்தப்பட்டதாக கூறப்படுகிறது .

இஸ்ரேலின் கான் செய்தி நிறுவனத்தின்படி , இந்தப் புதிய டிரோன், மின்காந்த அலைகளின் குறுக்கீடுகள் இருந்தபோதிலும் செயல்படக்கூடிய காட்சி வழிகாட்டு அமைப்புடன் பொருத்தப்பட்டுள்ளது .

ரேடார் கருவிகளால் கண்டறியப்படாமல் பயணிக்கும் திறன், பல்லாயிரக்கணக்கான கிலோமீட்டர் தூரம் பறக்கும் திறன், ஐந்து கிலோகிராம் வரை வெடிபொருட்களைச் சுமந்து செல்லும் திறன் மற்றும் கட்டிடங்களுக்கு உள்ளேயும் இயக்கக்கூடிய அதிநவீன தொழில்நுட்பம் ஆகியவை இதன் சில முக்கிய அம்சங்களாகும் .

திங்கள்கிழமை அதிகாலையில் தொடங்கிய இந்தத் தாக்குதல்கள், கிரியாட் ஷ்மோனா, மெதுலா மற்றும் திபேரியாஸ் உள்ளிட்ட பகுதிகள் ட்ரோன்கள் மூலம் குறிவைத்துள்ளன.

மேலும், கோலானி படைப்பிரிவுக்குச் சொந்தமான பயிற்சி மையங்களும், டெஃபென் இராணுவத் தளமும் குறிவைக்கப்பட்டதாக தெரிவிக்கப்பட்டுள்ளது.

இஸ்ரேலிய பாதுகாப்பு அமைப்புகளால் இந்த ட்ரோன்களில் ஒரு சிறிய எண்ணிக்கையை மட்டுமே இடைமறிக்க முடிந்ததாகவும், மீதமுள்ளவை அவற்றின் குறிவைத்த இலக்குகளில் தரையிறங்கியதாகவும் ஊடக அறிக்கைகள் தெரிவிக்கின்றன .

இவ்விவகாரம் குறித்து கருத்து தெரிவித்த ஹிஸ்புல்லா அமைப்பின் முக்கிய உறுப்பினர் ஷேக் நயீம் காசிம், லெபனானுக்கு எதிரான அமெரிக்க – இஸ்ரேலிய ஆக்கிரமிப்பு முற்றிலுமாக நிறுத்தப்படும் வரை, பதிலடி கொடுக்கும் இந்த நோக்கம் கைவிடப்படாது என்று தெரிவித்தார் .

2024ஆம் ஆண்டு எட்டப்பட்ட போர் நிறுத்த ஒப்பந்தங்களை இஸ்ரேல் தொடர்ந்து மீறி வருவதன் காரணமாகவே இந்த நடவடிக்கையை எடுக்க வேண்டிய கட்டாயம் ஏற்பட்டதாக அந்த அமைப்பு வலியுறுத்துகிறது .

தெற்கு லெபனானில் உள்ள டயர் மற்றும் நபாட்டியா நகரங்கள் மீது இஸ்ரேல் நடத்திய கடுமையான தாக்குதல்களைத் தொடர்ந்து இராணுவ நிலைமை மேலும் மோசமடைந்துள்ளது.

இந்தத் தாக்குதல்களில் குழந்தைகள் உட்பட ஏராளமான பொதுமக்கள் கொல்லப்பட்டுள்ளமை குறிப்பிடத்தக்கது.

The post போர் களத்தில் நுழையும் தற்கொலை ட்ரோன்! appeared first on Oruvan.com.

ஒரு காலத்தில் அமெரிக்காவும் ஈரானும் நெருங்கிய நண்பர்களாக இருந்தனர் என்பது இன்றைய தலைமுறைக்கு வியப்பாக இருக்கலாம். 1950-களில் ஈரானை ஆட்சி செய்த Mohammad Reza Shah Pahlavi, அமெரிக்காவின் மிக நெருங்கிய கூட்டாளியாக இருந்தார். அந்தச் சமயத்தில் அமெரிக்காதான் ஈரானுக்கு அணுசக்தி தொழில்நுட்பத்தையே வழங்கியது. ஆனால், இந்த இணக்கமான பொற்காலம் நீண்ட காலம் நீடிக்கவில்லை.

இந்த நட்பு 1979-ல் தலைகீழாக மாறியது. ஷா மன்னர் திணித்த மேற்கத்திய கலாசாரம் மற்றும் ‘SAVAK’ எனும் ரகசியப் பொலிஸாரின் அடக்குமுறைக்கு எதிராக வெடித்த ஈரானியப் புரட்சியால், மன்னர் பதவியிறக்கப்பட்டு, அயதுல்லா கொமேனி தலைமையிலான இஸ்லாமிய ஆட்சி அமைந்தது.

புற்றுநோய் சிகிச்சைக்காக அமெரிக்காவில் தஞ்சமடைந்த ஷா மன்னரை மீண்டும் ஈரானிடம் ஒப்படைக்க அமெரிக்கா மறுத்தது. இதனால் ஆத்திரமடைந்த ஈரானிய மாணவர்கள் அமெரிக்கத் தூதரகத்தை முற்றுகையிட்டு, 52 அதிகாரிகளை 444 நாட்கள் பிணைக் கைதிகளாகப் பிடித்தனர். இந்தச் சம்பவம் அமெரிக்காவின் வரலாற்றில் ஒரு ‘ஆறாத வடுவாக’ மாறி, இரு நாடுகளையும் பரம எதிரிகளாக்கியது.

ஈரான் அணு ஆயுதம் தயாரிப்பதே கடந்த 20 ஆண்டுகால உலக அரசியலின் மையப்புள்ளி. 2025-ஆம் ஆண்டு மே மாதம், ஈரானின் அணு ஆயுதக் கிடங்குகளை முழுமையாக அழித்துவிட்டதாக அமெரிக்கா அறிவித்தது. ஆனால், இப்போது மீண்டும் ஈரான் அணு ஆயுதம் தயாரிப்பதாகக் கூறி தாக்குதலைத் தீவிரப்படுத்தியுள்ளது. அழித்துவிட்டதாகச் சொன்ன கிடங்குகள் ஓராண்டுக்குள் மீண்டும் எப்படி வந்தன? அன்று அமெரிக்கா சொன்னது பொய்க்கணக்கா அல்லது ஈரானின் இரகசிய தொழில்நுட்பம் அவ்வளவு வலிமையானதா?

இங்கேதான் அரசியல் சதுரங்கத்தின் ஒரு அதிர்ச்சிகரமான திருப்பம் அரங்கேறியது. 2026 பிப்ரவரி 26-ஆம் திகதி, ஓமான் தலைநகர் மஸ்கட்டில் வைத்து இரு நாடுகளுக்கும் இடையே ரகசிய சமாதானப் பேச்சுவார்த்தை நடைபெற்றது. பேச்சுவார்த்தை வெற்றி என அறிவிக்கப்பட்ட 24 மணிநேரத்திற்குள், பிப்ரவரி 28 அதிகாலையில் அமெரிக்கா ஈரானின் முக்கிய தளங்கள் மீது ஏவுகணைத் தாக்குதல்களைத் தொடுத்தது. சமாதானம் பேசிக்கொண்டே ஈரானை ரகசியமாகச் சுற்றி வளைத்த அமெரிக்காவின் இந்த நடவடிக்கை, ஒரு திட்டமிட்ட ‘தந்திரோபாய ஏமாற்று வேலை‘ என்றே பார்க்கப்படுகிறது.

தனது நாட்டின் பொருளாதாரத்தைப் பாதிக்கும் நிலையிலும், அமெரிக்கா ஏன் இஸ்ரேலுக்காக ஈரானுடன் இத்தனை பெரிய மோதலில் ஈடுபட்டுள்ளது? இதற்கு மூன்று முக்கிய காரணங்கள் உள்ளன

பாதுகாப்பு ஒப்பந்தம்: மத்திய கிழக்கில் அமெரிக்காவின் ஒரே ஜனநாயகக் கூட்டாளி இஸ்ரேல் மட்டுமே. அதன் பாதுகாப்பை உறுதி செய்வது அமெரிக்க வெளியுறவுக் கொள்கையின் பிரிக்க முடியாத அங்கம்.

ஈரானின் அச்சுறுத்தல்: ‘இஸ்ரேல் என்ற நாடு உலக வரைபடத்திலிருந்து துடைத்தெறியப்பட வேண்டும்’ என்பது ஈரானின் நிலைப்பாடு. ஹெஸ்புல்லா மற்றும் ஹமாஸ் போன்ற ஈரானிய ஆதரவு அமைப்புகளை முடக்க ஈரானை வீழ்த்துவது அமெரிக்காவின் வியூகம்.

அமெரிக்க உள்நாட்டு அரசியல்: அமெரிக்காவின் பொருளாதாரம் மற்றும் அரசியலில் செல்வாக்கு மிக்க ‘Jewish Lobby’ அமைப்புகளின் அழுத்தம், எந்தவொரு அமெரிக்க ஜனாதிபதியையும் இஸ்ரேலுக்கு ஆதரவாக நிற்க வைக்கிறது.

2018-ல் அணுசக்தி ஒப்பந்தத்திலிருந்து விலகிய பிறகு அமெரிக்கா விதித்த பொருளாதாரத் தடைகள் ஈரானின் முதுகெலும்பை உடைத்துள்ளன. எண்ணெய் ஏற்றுமதி முடங்கியதால் விலைவாசி உயர்ந்து மக்கள் கடும் துயரத்தில் உள்ளனர். பொருளாதார நெருக்கடியை ஏற்படுத்தி, மக்களை அரசாங்கத்திற்கு எதிராகத் திருப்புவதே அமெரிக்காவின் நோக்கம்.

உண்மையில், ஈரானில் உள்ள ஒருசாரார் ஆட்சி மாற்றத்தை விரும்பினாலும், பெரும்பான்மையான மக்கள் அமெரிக்காவின் இந்தத் தலையீடு தங்களது இறையாண்மைக்கு எதிரானது எனக் கருதி வீதிகளில் இறங்கிப் போராடுகின்றனர். அமெரிக்கா எதிர்பார்த்த உள்நாட்டுப் போர் ஏற்படவில்லை, மாறாக மக்கள் தேசப்பற்றுடன் அமெரிக்காவின் வியூகங்களை எதிர்க்கத் தொடங்கியுள்ளனர்.

தாக்குதல்கள் உச்சக்கட்டத்தை எட்டியபோது, ஈரானின் உச்சத்தலைவர் அயதுல்லா அலி கமேனி தனது பதுங்கு குழிகளுக்குச் செல்லாமல், தனது அலுவலகத்திலிருந்தே தாக்குதல்களை எதிர்கொண்டு அங்கேயே உயிர்நீத்தார். கமேனியின் மறைவுக்குப் பின் ஈரானில் ஆட்சி மாற்றத்தை ஏற்படுத்தலாம் என அமெரிக்கா போட்ட கணக்கு பொய்த்துப் போனது. மாறாக, கமேனியின் மரணம் ஈரானிய மக்களிடையே ஒரு புதிய அக்னியை மூட்டியுள்ளது.

இலங்கைக்கு அருகாமையில் ஈரானியப் போர்க்கப்பல் ‘IRIS Dena‘ மீதான அமெரிக்கத் தாக்குதல், இந்தப் போரை இந்தியப் பெருங்கடலுக்கும் கொண்டு வந்துள்ளது. இதனால் ஆசிய நாடுகளுக்கான 60 சதவீத எரிபொருள் விநியோகம் முடங்கும் அபாயம் ஏற்பட்டுள்ளது. ஹார்முஸ் நீரிணை மூடப்பட்டதால், கடல்சார் காப்பீட்டுத் தொகைகள் 500 சதவீதம் உயர்ந்துள்ளன.

அமெரிக்காவின் பலமும் ஈரானின் விடாப்பிடித் தனமும் இன்று மத்திய கிழக்கை ஒரு எரிமலையாக மாற்றியுள்ளது. 47 ஆண்டுகாலப் பகை இன்று ஒரு புதிய உலகப் போருக்கு வித்திடுமா அல்லது அமைதியில் முடியுமா? காலம் தான் பதில் சொல்ல வேண்டும்.

தொகுப்பு : தர்மராஜா ரஸ்மிலா

The post போரின் விளிம்பில்: அமெரிக்கா – ஈரான் மோதலின் முழுப்பின்னணி appeared first on Oruvan.com.

இதனை  ஹிஸ்பொல்லா அமைப்பு உறுதிப்படுத்தியுள்ளது.

ஞாயிற்றுக்கிழமை தெற்கு பெய்ரூட்டில் உள்ள ஹிஸ்பொல்லா கோட்டையான தஹியேயில் உள்ள ஒரு அடுக்குமாடி குடியிருப்பில் நடந்த தாக்குதலில் குறைந்தது ஐந்து பேர் உயிரிழந்துள்ளனர்.

உயிரிழந்தவர்களில், ஆயுதப் பிரிவின் தலைமைத் தளபதி தபதாபாயும் அடங்குவார் என தெரிவிக்கப்பட்டுள்ளது.

“பெய்ரூட்டின் தெற்கு புறநகர்ப் பகுதியில் உள்ள ஹரேத் ஹ்ரீக் பகுதியில் நடந்த தாக்குதலில்” “மாபெரும் தளபதி” தபதாபாய் கொல்லப்பட்டதாக அறிக்கை ஒன்றில் ஹிஸ்பொல்லா தெரிவித்துள்ளது.

2024ஆம் ஆண்டு நவம்பர் மாதம் போர் தொடங்கியதில் இருந்து இரு தரப்பினருக்கும் இடையே ஒரு வருடத்திற்கும் மேலாக நீடித்த சண்டையில் இஸ்ரேலால் கொல்லப்பட்ட மிக மூத்த ஹிஸ்பொல்லா தளபதி தபதாபாய் ஆவார்.

எவ்வாறாயினும், கடந்த ஆண்டு போருக்குப் பிறகு அவரைக் கொல்ல இராணுவம் மேற்கொண்ட மூன்றாவது முயற்சி இதுவென்று இஸ்ரேலிய ஊடகங்கள் தெரிவித்தன.

இந்நிலையில், இஸ்ரேலின் தாக்குதல் “சிவப்பு எச்சரிக்கை கோட்டை” தாண்டிவிட்டதாகவும், பதில் தாக்குதல் நடத்தப்படுமா என்பது குறித்து பரிசீலித்து வருவதாகவும் ஹிஸ்பொல்லாவின் மூத்த அதிகாரி மஹ்மூத் குமதி தெரிவித்துள்ளார்.

The post லெபனான் தலைநகர் மீது இஸ்ரேல் தாக்குதல் – ஹிஸ்பொல்லா அமைப்பின் உயர் இராணுவத் தளபதி பலி appeared first on Oruvan.com.

கடந்த செப்டம்பர் மாதம் இவர் கொலை செய்யப்பட்ட நிலையில் சுமார் 04 மாதங்களுக்குப் பின்னர் இன்று ஞாயிற்றுக்கிழமை
அவரது இறுதிக் கிரியையகள் (23) நடைபெறுகின்றன.

பாதுகாப்பு காரணங்களுக்காக தாமதமான பொது இறுதிச் சடங்கு பெய்ரூட்டின் கேமில் சாமூன் ஸ்போர்ட்ஸ் சிட்டி ஸ்டேடியத்தில் திட்டமிடப்பட்டுள்ளது.

உலகெங்கிலும் இருந்து வந்த ஆயிரக்கணக்கான தனிநபர்கள் மற்றும் ஆர்வலர்கள் தவிர 65 நாடுகளைச் சேர்ந்த சுமார் 800 பிரமுகர்கள் இறுதிச் சடங்கில் கலந்துகொள்வார்கள் என ஹிஸ்புல்லா அதிகாரி அலி தாமோஷ் தெரிவித்துள்ளார்.

The post மறைந்த ஹிஸ்புல்லா தலைவருக்கு இன்று இறுதி அஞ்சலி appeared first on Oruvan.com.

இந்நிலையில் பல கட்ட பேச்சுவார்த்தைக்குப் பின்னர் இஸ்ரேல் – காஸா தரப்பினருக்கிடையில் போர் நிறுத்தம் தற்போது அமுலுக்கு வந்துள்ளது.

இவ்வாறிருக்க ஹிஸ்புல்லா அமைப்பின் மூத்த தளபதியாக ஷேக் முகமது அலி ஹமாதி மர்ம நபர்களால் சுட்டுக் கொல்லப்பட்டுள்ளார்.

கிழக்கு லெபனானில் அமைந்துள்ள பெக்கா பள்ளத்தாக்கு பகுதியில் அமைந்துள்ள அவரது வீட்டின் முன்பே மர்ம நபர்கள் அவரை சுட்டுள்ளனர். இதில் 6 குண்டுகள் அவர் மீது பாய்ந்ததினால் சம்பவ இடத்திலேயே உயிரிழந்ததாக கூறப்படுகிறது.

கடந்த 1985 ஆம் ஆண்டு ரோம் நகரிலிருந்து ஏதேன்ஸ் நோக்கிச் சென்ற விமானத்தைக் கடத்தி அதில் அமெரிக்கர் ஒருவரை கொலை செய்த சம்பவத்தில் முக்கிய குற்றவாளியான அலி ஹமாதி அமெரிக்காவின் எப்.பி.ஐ அமைப்பால் தேடப்பட்டு வந்த நபர் ஆவார்.

இந்நிலையில் குடும்பத் தகராறின் காரணமாக அலி ஹமாதி சுட்டுக் கொல்லப்பட்டிருக்கலாம் என அந்நாட்டு ஊடகங்கள் தெரிவிக்கின்றன.

The post ஹிஸ்புல்லா அமைப்பின் மூத்த தளபதி அலி ஹமாதி சுட்டுக் கொலை appeared first on Oruvan.com.

இந்த தாக்குதல் பற்றிய தகவல்களை முன்னாள் உளவாளிகள் வெளிப்படுத்தினர். சமீபத்தில் மொசாட்டில் இருந்து ஓய்வு பெற்ற இரண்டு மூத்த அதிகாரிகள் இந்த தகவல்களை வெளியிட்டுள்ளனர்.

கடந்த மூன்று மாதங்களுக்கு முன்பு லெபனானின் தலைநகரான பெய்ரூட்டில், பல ஹிஸ்புல்லா போராளிகள் பேஜர் மற்றும் வாக்கி – டாக்கி குண்டுவெடிப்பில் கொல்லப்பட்டனர்.

ஹிஸ்புல்லா அமைப்பினர் ஆயிரக்கணக்கான வாக்கி-டாக்கிகள் மற்றும் பேஜர்களை இஸ்ரேலில் தயாரிக்கப்பட்டது என்பதை உணராமல் எப்படி ஏமாற்றினார் என்று இரண்டு முன்னாள் மொசாட் முகவர்கள் கூறினார்கள்.

இந்த தாக்குதல்களில் டஜன் கணக்கான மக்கள் கொல்லப்பட்டதுடன், ஆயிரக்கணக்கானோர் காயமடைந்தனர்.

இது ஹிஸ்புல்லா உறுப்பினர்களை மட்டுமே குறிவைக்கும் வகையில் வடிவமைக்கப்பட்டதாக இஸ்ரேல் கூறியது, ஆனால் பாதிக்கப்பட்டவர்களில் பொதுமக்களும் இருப்பதாக லெபனான் அதிகாரிகள் தெரிவித்தனர்.

இஸ்ரேலும், ஹிஸ்புல்லாவும் தொடர்ந்து மோதலில் ஈடுபட்டு வருகின்றனர். 2023ஆம் ஆண்டு ஒக்டோபர் ஏழாம் திகதி ஹமாஸ் மேற்கொண்ட தாக்குதலை தொடர்ந்து ஹிஸ்புல்லாவும் இஸ்ரேல் மீது தாக்குதல் நடத்தியிருந்தது.

இதனையடுத்து இரு தரப்பினர்களும் தொடர் தாக்குதல்களை மேற்கொண்டுள்ளனர். இதன் ஒரு பகுதியாக இந்த கடந்த செப்டம்பர் 17ஆம் திகதி லெபனான் முழுவதும் ஒரே நேரத்தில் ஆயிரக்கணக்கான பேஜர்கள் வெடித்தன.

முக்கியமாக ஹிஸ்புல்லாக்கல் இருக்கும் பகுதிகளில் இந்த குண்டுவெடிப்புகள் நடந்ததுடன், இதனால் பெரும் பரபரப்பும் ஏற்பட்டிருந்தது. மறு நாள் வாக்கி-டாக்கிகள் வெடித்து, நூற்றுக்கணக்கானோர் கொல்லப்பட்டனர்.

தாக்குதல் நடந்து இரண்டு மாதங்களுக்கு பின்னர் இஸ்ரேல் பிரதமர் பெஞ்சமின் நெதன்யாகு தாக்குதலுக்கு பொறுப்பேற்றிருந்தார். இந்நிலையில், இந்த தாக்குதலின் விபரங்களை சமீபத்தில் மொசாட்டில் இருந்து ஓய்வு பெற்ற மூத்த அதிகாரிகள் வெளிப்படுத்தியுள்ளனர்.

மைக்கேல் என்று பெயரிடப்பட்ட முகவர்களில் ஒருவர், மொசாட் வாக்கி-டாக்கிகளை இயக்கும் பேட்டரிகளுக்குள் ஒரு வெடிக்கும் சாதனத்தை மறைத்து வைத்திருந்ததாகக் கூறினார்.

இது பொதுவாக அணிந்தவரின் இதயத்திற்கு அருகில் ஒரு ஆடையில் கொண்டு செல்லப்படும் என்று அவர் கூறினார்.

10 வருடங்களுக்கு முன்னர் ஒரு போலி நிறுவனத்திடம் இருந்து 16,000 வாக்கி-டாக்கிகளை “நல்ல விலைக்கு” ஹிஸ்புல்லா அறியாமல் வாங்கியதாக அவர் கூறினார்.

“இஸ்ரேலுக்கு எந்த தொடர்பும் இல்லாத வெளிநாட்டு நிறுவனங்களை உருவாக்குவதற்கான நம்பமுடியாத சாத்தியக்கூறுகள் எங்களிடம் உள்ளன” என்று மைக்கேல் கூறினார்.

“நாங்கள் ஒரு பாசாங்கு உலகத்தை உருவாக்குகிறோம். நாங்கள் ஒரு உலகளாவிய தயாரிப்பு நிறுவனம். நாங்கள் திரைக்கதை எழுதுகிறோம், நாங்கள் இயக்குனர்கள், நாங்கள் தயாரிப்பாளர்கள், நாங்கள் முக்கிய நடிகர்கள், மற்றும் உலகமே எங்கள் மேடை.”

இந்த செயல்பாடு இரண்டு ஆண்டுகளுக்கு முன்பு பேஜர்களை உள்ளடக்கியதாக விரிவுபடுத்தப்பட்டது என்று அவர் குறிப்பிட்டுள்ளார்.

அந்த நேரத்தில் ஹிஸ்புல்லா கோல்ட் அப்பல்லோ என்ற தைவானிய நிறுவனத்திடமிருந்து பேஜர்களை வாங்குவதைக் கண்டறிந்ததாக அவர் தெரிவித்துள்ளார்.

இதனையடுத்து ஒரு போலி நிறுவனத்தை நிறுவி, தாய் நிறுவனத்திற்கு தெரியாமல் வெடிபொருட்களை கொண்ட பேஜர்களில் கோல்ட் அப்பல்லோ பெயரைப் பயன்படுத்தப்பட்டது.

மொசாட் வெடிமருந்துகளை உள்ளே வைத்ததாகவும், அது பயனரை மட்டுமே காயப்படுத்தும் சக்தி வாய்ந்தது என்றும் மைக்கேல் தெரிவித்துள்ளார்.

“குறைந்தபட்ச சேதம் இருப்பதை உறுதி செய்வதற்காக எல்லாவற்றையும் பலமுறை சோதனை செய்கிறோம்,” என்று கேப்ரியல் என்று அழைக்கப்படும் இரண்டாவது முகவர் தெரிவித்துள்ளார்.

மொசாட் குறிப்பாக ஒரு ரிங்டோனைத் தேர்ந்தெடுத்தது, உள்வரும் செய்தியை யாராவது சரிபார்க்கும் அளவுக்கு அவசரமாக ஒலிக்கும்.

பேஜர்களை வாங்குவதற்கும், விளம்பரப் படங்கள் மற்றும் பிரசுரங்களை உருவாக்குவதற்கும், அவற்றை இணையத்தில் பகிர்வதற்கும் ஹிஸ்புல்லாவை ஏமாற்றியதாக கேப்ரியல் கூறினார்.

“அவர்கள் எங்களிடம் வாங்கும் போது, ​​அவர்கள் மொசாட்டில் இருந்து வாங்குகிறார்கள் என்பதற்கான பூஜ்ஜிய துப்பு இல்லை,” என்று அவர் கூறினார். திரைக்குப் பின்னால் எல்லாம் எங்களால் கட்டுப்படுத்தப்படுகிறது.”

செப்டெம்பர் 2024க்குள் கண்ணி வெடியில் சிக்கிய 5,000 பேஜர்களை ஹிஸ்புல்லா வாங்கியதாக தெரிவிக்கப்பட்டுள்ளது.

இந்த வெடிப்புகள் லெபனான் முழுவதும் அதிர்ச்சி அலைகளை ஏற்படுத்தியது, பல்பொருள் அங்காடிகள் உட்பட பேஜர்கள் கொண்டு செல்லப்படும் எல்லா இடங்களிலும் வெடிப்புகள் நடந்தன.

மருத்துவமனைகள் உயிரிழப்புகளால் நிரம்பியதுடன் தாக்குல் காரணமாக பலர் ஊனமுற்றனர். இதன்போது ஹிஸ்புல்லா தலைவர் ஹசன் நஸ்ரல்லாஹ்வின் முன்னால் மக்கள் பலியாகியதாக ஒரு “வலுவான தகவல்” இருப்பதாக கேப்ரியல் கூறினார்.

இந்த தாக்குதலில் இருந்து ஹிஸ்புல்லா இன்னும் மீளாத நிலையில், இஸ்ரேல் ஹிஸ்புல்லாவின் இலக்குகளுக்கு எதிராக தீவிர வான்வழித் தாக்குதல்களை தொடுத்திருந்திருந்தமை குறிப்பிடத்தக்கது.

The post பேஜர் தாக்குதல்கள் எவ்வாறு நடத்தப்பட்டன? – மொசாட்டின் திட்டம் அம்பலமானது appeared first on Oruvan.com.