இஸ்ரேல்-காசா போர்: முன்மொழியப்பட்ட போர் நிறுத்த ஒப்பந்தத்திற்கு ஹமாஸின் சாதகமான பதில்

பாலஸ்தீனிய போராளிக் குழுவான ஹமாஸ் செவ்வாயன்று காசாவுக்கான முன்மொழியப்பட்ட போர்நிறுத்த ஒப்பந்தத்திற்கு தனது பதிலை வழங்கியதாகக் கூறியது.

அதில் பணயக்கைதிகளை விடுவிப்பதும் அடங்கும், மேலும் ஒப்பந்தம் எட்டப்படும் என்று அமெரிக்கா நம்பிக்கை வெளியிட்டுள்ளது.

இஸ்ரேல், அமெரிக்கா, கட்டார் மற்றும் எகிப்து ஆகிய நாடுகளால் ஏற்படுத்தப்பட்ட ஒப்பந்தத்தின் விவரங்கள் வெளியிடப்படவில்லை.

இஸ்ரேலிய பிரதமர் அலுவலகம் செவ்வாயன்று தாமதமாக ஹமாஸின் பதில் விவரங்கள் பேச்சுவார்த்தைகளில் ஈடுபட்டுள்ள அதிகாரிகளால் முழுமையாக மதிப்பீடு செய்யப்படுகின்றன என்று கூறியது.

ஹமாஸின் பதிலை மதிப்பாய்வு செய்யும் வொஷிங்டன்

மத்திய கிழக்கிற்கு விஜயம் மேற்கொண்டுள்ள அமெரிக்க வெளிவிவகார அமைச்சர் ஆண்டனி பிளிங்கன், ஹமாஸ் பதிலை வொஷிங்டன் மதிப்பாய்வு செய்து வருவதாகவும், புதன் கிழமை நாட்டிற்கு வரும்போது இஸ்ரேலிய அதிகாரிகளுடன் விவாதிப்பதாகவும் கூறினார்.

எவ்வாறெனினும், அமெரிக்க ஜனாதிபதி ஜோ பைடன், ஒப்பந்தத்தின் சில நகர்வுகளை ஏற்றுக் கொண்ட போதிலும், ஹமாஸின் சில கோரிக்கை ' சற்று அதிகமானவை' என்று மறைமுகமாக விவரித்துள்ளார்.

எனினும் தற்போது பேச்சுவார்த்தைகள் தொடர்ந்து நடைபெற்று வருகின்றன என்று அவர் வொஷிங்டனில் கூறினார்.

முழுமையான போர்நிறுத்தத்தை உறுதி செய்ததாக ஹமாஸ் அறிவிப்பு

ஒப்பந்தம் குறித்து ஹமாஸ் தனது அறிக்கையில்,

இந்த முன்மொழிவை நேர்மறையான உணர்வோடு கையாண்டோம், ஒரு விரிவான மற்றும் முழுமையான போர்நிறுத்தத்தை உறுதி செய்தோம், எங்கள் மக்களுக்கு எதிரான ஆக்கிரமிப்புக்கு முற்றுப்புள்ளி வைத்தோம், நிவாரணம், தங்குமிடம் மற்றும் புனரமைப்பு ஆகியவற்றை உறுதி செய்தோம், காசா பகுதியில் முற்றுகையை நீக்கி சாதிக்கிறோம்.

எனினும் போர் மற்றும் இஸ்ரேலியப் படைகள் காசாவை விட்டு வெளியேறும் என்ற உத்தரவாதம் இல்லாமல் பணயக்கைதிகளை விடுவிக்க அனுமதிக்காது என்றும் பாலஸ்தீனிய இஸ்லாமிய இயக்கம் குறிப்பிட்டது.

பணயக்கைதிகளை விடுவிப்பதே இலக்கு

ஹமாஸை அழிக்கும் வரை இஸ்ரேல் போராடும் என பிரதமர் பெஞ்சமின் நெதன்யாகு தெரிவித்துள்ளார்.

ஆனால், ஹமாஸுடன் ஒப்பந்தம் செய்தாலும், பணயக்கைதிகளை நாட்டிற்கு அழைத்து வர அதிக முயற்சியைக் கோரும் இஸ்ரேலிய இயக்கமும் வளர்ந்து வருகிறது.

பாரபட்சமற்ற சிந்தனைக் குழுவான இஸ்ரேல் ஜனநாயக நிறுவனம் வெளியிட்ட கருத்துக் கணிப்பில், பதிலளித்தவர்களில் 51% பேர் பணயக்கைதிகளை மீட்பதே போரின் முக்கிய குறிக்கோளாக இருக்க வேண்டும் என்றும், 36% பேர் ஹமாஸை வீழ்த்த வேண்டும் என்றும் கூறியுள்ளனர்.

இஸ்ரேலின் தலைமை இராணுவ செய்தித் தொடர்பாளர் ரியர் அட்மிரல் டேனியல் ஹகாரி செவ்வாயன்று, காசாவில் தடுத்து வைக்கப்பட்டிருந்த எஞ்சிய பணயக்கைதிகளில் 31 பேர் இறந்துவிட்டதாக அறிவித்தார்.

நவம்பரில் இஸ்ரேல் 240 பாலஸ்தீனியர்களை விடுவித்தபோது, ​​இதுவரை ஒப்புக் கொள்ளப்பட்ட ஒரே ஒரு போர் நிறுத்தத்தின் கீழ் 110 பணயக்கைதிகள் விடுவிக்கப்பட்ட பின்னரும், 136 பணயக்கைதிகள் காசாவில் இன்னும் தடுத்து வைக்கப்பட்டிருப்பதாக இஸ்ரேல் முன்பு கூறியது.

இஸ்ரேலின் தாக்குதலில் 27,585 பாலஸ்தீனியர்கள் பலி

ஒக்டோபர் 7 ஆம் திகதி தெற்கு இஸ்ரேலில் ஹமாஸ் போராளிகள் குழு 1,200 பேரைக் கொன்றது மற்றும் 253 பணயக்கைதிகளை கைப்பற்றிய பின்னர் இஸ்ரேல் காசாவில் தனது இராணுவத் தாக்குதலைத் தொடங்கியது.

இஸ்ரேலின் இராணுவப் பிரச்சாரத்தில் குறைந்தது 27,585 பாலஸ்தீனியர்கள் கொல்லப்பட்டது உறுதி செய்யப்பட்டுள்ளதாக காசாவின் சுகாதார அமைச்சகம் தெரிவித்துள்ளது.

மேலும் ஆயிரக்கணக்கானோர் இடிபாடுகளுக்குள் புதையுண்டிருக்கலாம் என அஞ்சப்படுகிறது.

முந்தைய சண்டையில் இருந்து இடம்பெயர்ந்த நூறாயிரக்கணக்கான மக்களுக்கு அடைக்கலம் அளித்து வரும் காசாவின் பல பகுதிகளில் தனது தாக்குதலைத் தொடர்ந்து வரும் இஸ்ரேல், கடந்த 24 மணி நேரத்தில் அதன் படைகள், பல பாலஸ்தீனிய துப்பாக்கிதாரிகளைக் கொன்றதாகக் கூறியது.

காசாவின் 2.3 மில்லியன் மக்களில் பாதிக்கும் மேற்பட்டவர்கள் இப்போது பொதுக் கட்டிடங்கள் மற்றும் தற்காலிக கூடாரங்களில், எகிப்தின் எல்லைக்கு அருகில் தஞ்சமடைந்துள்ளனர்.