தங்கள் தயாரிப்புகளில் பயன்படுத்தப்படும் மூலப்பொருட்களின் விநியோகத்தை ஈரான் போர் தொடர்ந்து சீர்குலைத்தால், இந்த விலை அதிகரிப்பை மேற்கொள்ளவுள்ளதாக அதன் தலைமை நிர்வாக அதிகாரி கோ மியா கியாட் தெரிவித்துள்ளார்.

மோதல் தொடங்கியதிலிருந்து உற்பத்திச் செலவுகள் கடுமையாக அதிகரித்துள்ளதாக காரெக்ஸ் நிறுவனத்தின் தலைமை நிர்வாக அதிகாரி கோ மியா கியாட் ஊடகங்களிடம் தெரிவித்துள்ளார்.

மலேசியாவைத் தளமாகக் கொண்ட இந்நிறுவனம், ஆண்டுக்கு ஐந்து பில்லியனுக்கும் அதிகமான ஆணுறைகளை உற்பத்தி செய்கின்றது.

இங்கிலாந்தின் தேசிய சுகாதார சேவை போன்ற அரசு சுகாதார அமைப்புகளுக்கும் இந்த நிறுவனம் ஆணுறைகளை விநியோகம் செய்கிறது.

அமெரிக்க மற்றும் இஸ்ரேலிய வான்வழித் தாக்குதல்களுக்குப் பதிலளிக்கும் விதமாக, ஹார்முஸ் நீரிணை ஊடாக பயணிக்கும் கப்பல்களைத் தாக்குவோம் என ஈரான் அச்சுறுத்தல் விடுத்ததிலிருந்து, உலகளாவிய எண்ணெய் விநியோகம் கடுமையாகப் பாதிக்கப்பட்டுள்ளது.

மேலும், குறித்த நீரிணையை முற்றிலுமாக மூடி, உலகளாவிய விநியோகச் சங்கிலிகளில் பெரும் இடையூறுகளை ஏற்படுத்தியுள்ளது.

உலகின் கச்சா எண்ணெய் மற்றும் திரவமாக்கப்பட்ட இயற்கை எரிவாயு (LNG) ஆகியவற்றில் சுமார் ஐந்தில் ஒரு பங்கும், மற்ற பெட்ரோலிய வேதிப்பொருட்களும் பொதுவாக இந்த நீரிணை வழியாகவே கொண்டுச் செலப்படுகின்றன.

கரேக்ஸ், லேடெக்ஸைப் பாதுகாக்கப் பயன்படும் அம்மோனியா மற்றும் சிலிக்கான் அடிப்படையிலான மசகுப் பொருட்கள் உள்ளிட்ட, எண்ணெயிலிருந்து பெறப்படும் மூலப்பொருட்களைச் சார்ந்துள்ளது.

எவ்வாறாயினும், இந்த ஆண்டு ஆணுறைகளுக்கான தேவை சுமார் 30 வீதம் அதிகரித்துள்ளதாக தெரிவித்துள்ள மியா கியாட், அதிகரித்துள்ள சரக்குக் கட்டணங்கள் மற்றும் விநியோகத்தில் ஏற்படும் தாமதங்கள் பற்றாக்குறையை மேலும் மோசமாக்கியுள்ளதாகவும் குறிப்பிட்டுள்ளார்.

ஆணுறை விலைகளின் திடீர் உயர்வு, உலகின் எரிசக்தி சந்தைகளை ஏற்கனவே உலுக்கியுள்ள ஈரானுடனான அமெரிக்க-இஸ்ரேல் போர், நுகர்வோருக்கான பிற பொருட்களின் விலைகளையும் எவ்வாறு உயர்த்துகிறது என்பதை அடிக்கோடிட்டுக் காட்டுவதாக வல்லுநர்கள் தெரிவித்துள்ளனர்.

புதிய ஆய்வின்படி, போர் காரணமாக விமானக் கட்டணங்கள் திடீரென உயர்ந்துள்ளன, குறைந்த விலை எகானமி டிக்கெட்டுகளின் விலை, ஒரு வருடத்திற்கு முன்பு இருந்ததை விட சராசரியாக 24 வீதம் உயர்ந்துள்ளதாக தெரிவிக்கப்பட்டுள்ளது.

இதற்கிடையில், வளைகுடா வழியாக நடைபெறும் சரக்கு விநியோகத்தில் ஏற்பட்ட இடையூறு, உரங்களின் விலை உயர்வுக்கும், கணினி சில்லுகள் தயாரிக்கப் பயன்படும் ஹீலியத்திற்குத் தட்டுப்பாடு ஏற்படவும் வழிவகுத்துள்ளது.

உற்பத்தியாளர்கள் மூலப்பொருட்களைப் பெறுவதில் சிரமப்படுவதால், போத்தல் குடிநீர் தொழிலும் நெருக்கடியில் உள்ளதாக தெரிவிக்கப்பட்டுள்ளது.

போக்குவரத்துச் செலவுகள் அதிகரிப்பதன் காரணமாக சர்க்கரை, பால் பொருட்கள் மற்றும் பழங்களின் விலைகள் உயரும் என்று ஐக்கிய நாடுகள் சபை இந்த மாத ஆரம்பத்தில் எச்சரிக்கை விடுத்திருந்தமை குறிப்பிடத்தக்கது.

The post ஈரான் போர் எதிரொலி: உலகளவில் ஆணுறைக்கு கடும் தட்டுப்பாடு – விலையை உயர்த்தும் பிரபல நிறுவனம் appeared first on Oruvan.com.

முக்கிய நீர்வழியான ஹார்முஸ் நீரிணையை மீண்டும் தனது “கடுமையான கட்டுப்பாட்டிற்குள்” கொண்டு வருவதாக ஈரான் ராணுவத் தலைமை இன்று அறிவித்துள்ளது.

லெபனான் போர்நிறுத்தத்தைத் தொடர்ந்து இந்த நீரிணை நேற்று திறக்கப்பட்ட நிலையில், சில மணிநேரங்களிலேயே மீண்டும் கட்டுப்பாடுகள் விதிக்கப்பட்டுள்ளன.

ஈரானிய துறைமுகங்கள் மீதான அமெரிக்காவின் கடற்படை முற்றுகை தொடர்வதால் இந்த முடிவு எடுக்கப்பட்டுள்ளதாகத் தெரிகிறது.

இதனால் உலக சந்தையில் கச்சா எண்ணெய் விலையில் பெரும் ஏற்ற இறக்கங்கள் நிலவுகின்றன.

இந்திய மற்றும் சீனக் கப்பல்கள் தங்களின் நடுநிலைமையை வெளிப்படுத்தியபடி அந்த நீரிணையை கடக்க முயலும் அதேவேளையில், பல வணிகக் கப்பல்கள் பாதியிலேயே திரும்பிச் செல்கின்றன.

மற்றொருபுறம், ஒரு பெரிய அமைதி ஒப்பந்தம் மிக நெருக்கத்தில் இருப்பதாக அமெரிக்க ஜனாதிபதி டொனால்ட் ட்ரம்ப் நம்பிக்கை தெரிவித்துள்ளார்.

பாகிஸ்தான் ராணுவ தளபதி Asim Munir மற்றும் பிரதமர் Shehbaz Sharif ஆகியோர் இதற்கான சமரச முயற்சியில் தீவிரமாக ஈடுபட்டுள்ளனர். அடுத்த வாரம் இஸ்லாமாபாத்தில் இதற்கான இரண்டாம் கட்ட பேச்சுவார்த்தைகள் நடைபெறவுள்ளன.

இருப்பினும், ஈரானின் செறிவூட்டப்பட்ட யுரேனியத்தை ஒப்படைப்பதில் இரு நாடுகளுக்கும் இடையே இன்னும் முரண்பாடு நீடிக்கிறது.

யுரேனியத்தை ஒப்படைக்க ஈரான் ஒப்புக்கொண்டுள்ளதாக ட்ரம்ப் கூறினாலும், ஈரான் அதனை திட்டவட்டமாக மறுத்துள்ளது.

பிப்ரவரி 28-ம் திகதி தொடங்கிய இந்தப் போரில் உச்சக்கட்டமாக ஈரான் உச்சத்தலைவர் கொல்லப்பட்ட நிலையில், 50 நாட்களாக அங்கு இணையதள சேவையும் முடக்கப்பட்டுள்ளது.

இன்னும் நான்கு நாட்களில் போர்நிறுத்த ஒப்பந்தம் முடிவுக்கு வரவுள்ளதால், மத்திய கிழக்கில் பதற்றம் உச்சக்கட்டத்தை எட்டியுள்ளது.

The post மீண்டும் ஈரானின் பிடிக்குள் ஹார்முஸ் நீரிணை ; திறக்கப்பட்ட சில மணிநேரங்களிலேயே அதிரடி கட்டுப்பாடு appeared first on Oruvan.com.

பிரித்தானியாவின் தளங்களை அமெரிக்கா பயன்படுத்த அனுமதிப்பதில் அந்த நாடு இன்னும் வேகமாகச் செயல்பட்டிருக்க வேண்டும் என்றும் டொனாட்ல் ட்ரம்ப் குறிப்பிட்டுள்ளார்.

ஹார்முஸ் நீரிணை நெருக்கடி தீவிரமடைந்து வரும் நிலையில், நேட்டோ உறுப்பு நாடுகளைக் கோழைகள் என்றும் ட்ரம்ப் குற்றம் சாட்டியுள்ளார்.

வெள்ளை மாளிகைக்கு வெளியே செய்தியாளர்களிடம் பேசிய ட்ரம்ப், பிரித்தானியா மிகவும் தாமதமாக முடிவெடுத்துள்ளது எனக் கூறியதுடன், இரு நாடுகளுக்கும் இடையிலான உறவு நல்ல நிலையில் இருந்தாலும், இப்படியான ஒரு சூழல் இதற்கு முன்னர் ஏற்பட்டதில்லை எனவும் அவர் கூறியுள்ளார்.

பிரித்தானியாவே அமெரிக்காவின் முதன்மையான நட்பு நாடு என்றும் ட்ரம்ப் குறிப்பிட்டுள்ளார்.

இந்த நிலையில், அமெரிக்க ஜனாதிபதி டொனால்ட் ட்ரம்பின் கோரிக்கைகளுக்கு பிரித்தானியா உடனடியாக பதிலளித்தால், அது ஈரானில் போரை இன்னும் தீவிரப்படுத்தும் என பிரதமர் ஸ்டார்மர் விளக்கமளித்துள்ளார்.

இதேவேளை, பிரித்தானிய மக்களின் உயிருக்கும் நலன்களுக்கும் ஆபத்தை விளைவிக்கும் வகையில் ஈரான் தரப்பில் இருந்து தாக்குதலைத் தடுப்பதற்காக மட்டுமே, பிரதமர் ஸ்டார்மர் அரசாங்கம் முன்பு இராணுவத் தளங்களின் பயன்பாட்டை அனுமதித்திருந்தது.

ஆனால் தற்போது ஹார்முஸ் நீரிணையில் கப்பல் போக்குவரத்தை முடக்கும் வகையில் தாக்குதல் நடத்தும் ஈரானின் இலக்குகளை அழிக்கவும் தங்கள் தளங்களைப் பயன்படுத்தலாம் என பிரித்தானிய அமைச்சரவை ஒப்புதல் அளித்துள்ளது.

The post ஹார்முஸ் நீரிணை தொடர்பில்  பிரித்தானியா மிகவும் தாமதமாக முடிவெடுத்துள்ளது – அமெரிக்க ஜனாதிபதி அதிருப்தி appeared first on Oruvan.com.