அதேநேரம் ஜெயப்பூர் உற்பத்தி, எரிசக்தி, அதிநவீன தொழில்நுட்பம் மற்றும் இராணுவ துறைகளில் இந்தியா – அமெரிக்கா வேகம் காட்டத் தவறினால், அது உலகிற்கே மோசமான விளைவுகளை ஏற்படுத்தும் என்ற தொனியில் அமெரிக்க துணை ஜனாதிபதி ஜே.டி.வான்ஸ் எச்சரிக்கையுடன் சுட்டிக்காட்டிய விடயம் நியாயமானது என்ற தொனியில், இந்திய வெளியுறவு அமைச்சர் ஜெய்சங்கர் கூறியிருக்கிறார்.

சீனாவின் செல்வாக்கு

அதாவது குறித்த விடயங்களில் அமெரிக்க இந்தியக் கூட்டுச் செயற்பாட்டின் அவசியத்தை ஜெய்சங்கரும் வலியுறுத்துவதாக பிபிசி உலக செய்திச் சேவை கூறுகிறது.

இந்திய அதிகாரிகளுடன் இந்தோ – பசிபிக் பிராந்திய பாதுகாப்பு, சீனாவின் செல்வாக்கு மற்றும் உலகளாவிய வர்த்தக பிரச்சினைகள் தொடர்பாக இந்தியாவும் அமெரிக்காவும் குவாட் இராணுவக் கூட்டணியில் இணைந்து எதிர்கொள்ளும் என்று சென்ற 22 ஆம் திகதி ஜெய்ப்பூரில் இடம்பெற்ற கருத்தரங்கு ஒன்றில் வான்ஸ் உரை நிகழ்த்தியபோது பகிரங்கமாகக் கூறியிருக்கிறார்.

அதாவது இந்தோ – பசுபிக் பிராந்தியத்தில் சீனாவின் செல்வாக்கு மற்றும் சீன இராணுவ ஆதிக்கங்களை தடுக்க அமெரிக்க – இந்திய கூட்டுக்கு அவுஸ்திரேலியா, ஜப்பான் ஆகிய நாடுகளும் ஒத்துழைக்கும் என்றும் அவர் விபரித்திருக்கிறார். குவாட் இராணுவ கூட்டு அணியில் இந்த நாடுகள் பிரதான அங்கம் வகிக்கின்றன.

இப் பின்னணியில் அமெரிக்கத் துணை ஜனாதிபதி வான்ஸ் நிகழ்த்திய உரை அமெரிக்க இந்திய ஊடகங்களில் முக்கியம் பெறுகின்றன. இச் சூழலில்தான் அமெரிக்க உறவின் முக்கியத்துவம் பற்றி இலங்கை வெளியுறவு அமைச்சர் விஜித ஹேரத் கொழும்பில் கருத்து வெளியிட்டிருக்கிறார்.

ஜேவிபி எனப்படும் தேசிய மக்கள் சக்தி ஆட்சி அமைப்பதற்கு முன்னர் அதாவது எதிர்க்கட்சியாக இருந்தபோது அநுரகுமார திஸாநாயக்க அமெரிக்க – இந்திய நாடுகளுக்குப் பயணம் செய்தமை பற்றியும், இந்த இரு நாடுகளின் உறவுகள் இலங்கைக்கு முக்கியமானது என்பது தொடர்பாகவும் விஜத ஹேரத் சுட்டிக்காட்டியுள்ளார்.

அமரிக்க பொருளாதார குழுவுடன் சந்திப்பு

அமெரிக்க விரியின் பாதிப்புகள் மற்றும் இலங்கை பொருளாதாரத்தை முன்னேற்றுவது தொடர்பான அநுரகுமாரவின் ஆலோசனையுடன் இலங்கைப் பொருளாதார இராஜதந்திர குழு ஒன்று சென்ற 22 ஆம் திகதி வோசிங்டனில் பேச்சு நடத்தியுள்ளது.

ஆசியப் பிராந்தியத்தின் தெற்கு – மத்திய ஆசிய பகுதிகளுக்குப் பொறுப்பாகச் செயற்படும் அமெரிக்க வர்த்தகச் செயற்பாட்டுப் பிரிவு அலுவலகத்த்தின் (Office of the United States Trade Representative -USTR) தலைமைச் பிரதிநிதி பிரெண்டன் லின்ச் (Brendan Lynch) உள்ளிட்ட அமெரிக்க முதலிட்டுச் சபை உறுப்பினர்கள் பலருடன் இலங்கைப் பொருளாதார இராஜதந்திரக் குழு பேச்சு நடத்தியிருக்கிறது.

இலங்கைக்குப் பாதகம் இல்லாத முறையில் வர்த்தக ஒப்பந்தங்கள் செய்வதற்கு இணக்கம் ஏற்பட்டுள்ளது. இந்திய வர்த்தகச் சபை உறுப்பினர்களையும் இலகைப் பொருளாதார இராஜதந்திர குழு சந்திக்கவுள்ளது. விரைவில் கொழும்பில் சந்தப்புகள் இடம்பெறவுள்ளன.

அதேவேளை அமெரிக்க – இந்திய உறவுகள் பற்றியும் சீனாவோடு பொருளாதார உறவைப் பேணுவது குறித்தும் வெளியுறவு இலங்கை அமைச்சு தீவிரமாக ஆராய்ந்து வருகிறது.

குறிப்பாக அமெரிக்க – இந்திய உறவு தொடர்பாகவும் அந்த உறவுடன் இலங்கை சேர்ந்து பயணிக்க வேண்டிய அவசியம் பற்றியும் ஆராயப்பட்டு வருவதாகக் கொழும்பில் தகவல்கள் கசிந்துள்ளன. வெளியுறவு அமைச்சர் விஜத ஹேரத் தலைமையில் இலங்கைப் பொருளாதார இராஜதந்திரிகள் (Economic Diplomats) இது தொடர்பான

அதாவது அமெரிக்காவுடன் இலங்கை நேரடியான உறவை பேணுவது அநுரகுமார அரசாங்கத்தின் பிரதான இலக்கு என்பது தெரிகிறது.

தற்போது குழப்பமடைந்திருக்கும் சர்வதேச ஒழுங்கு முறைக்குள் இராணுவ மற்றும் பொருளாதார விஸ்தரிப்பு விவகாரங்களில் புதிய உருவெடுக்கும் அமெரிக்க – இந்திய உறவுக்குள், தங்கி வாழும் புதிய அரசியல் அணுகுமுறை ஒன்றை அநுர வகுக்கிறார் என்பது சமீபத்திய தகவல்.

காஷ்மீரில் கடந்த வாரம் 27 சுற்றுலா பயணிகள் சுட்டுக் கொல்லப்பட்ட பின்னர் இந்தியா – பாகிஸ்தான் இராஜதந்திர உறவு முறிவு மற்றும் சமீபத்திய புவிசார் அரசியல் சூழல் இலங்கைக்குச் சாதகமான ஒன்றே.

ஆகவே ஈழத்தமிழர் விவகாரத்தை சர்வதேச அரங்கில் இருந்து முற்றாக நீக்க வேண்டுமானால், சீனாவை விடவும் அமெரிக்க – இந்திய உறவு பாதுகாப்பானது என்ற உணர்வு ராஜபக்ச குடும்பத்துக்கும் இருந்தது. ஏறத்தாள ஜேஆர், சந்திரிகா கால அணுகுமுறைதான்.

ஆனால் புதிய அரசியல் கோணத்தில் ஈழத்தமிழர்களின் ‘அரசியல் விடுதலை’ என்பதன் நியாயப்பாடுகள் அத்தனையும் தேசிய மக்கள் சக்திக்குள் கரைக்கப்படுகின்றன.

அதேவேளை, அமெரிக்கத் துணை ஜனாதிபதியுடன் புதுடில்லிக்குப் பயணம் செய்திருந்த அமெரிக்கப் பாதுகாப்புத் துறையின் மூத்த அதிகாரி மைக்கல் வால்ட்ஸ், இந்திய தேசிய பாதுகாப்பு ஆலோசகர் அஜித் டோவாலை சந்தித்துப் பேசியிருக்கிறார். இதன்போது இந்தோ – பசுபிக் விவகாரத்தில் அயல் நாடுகளின் பாதுகாப்பு செயற்பாடுகள் பற்றியும் பேசப்பட்டிருப்பதாக டில்லித் தகவல்கள் தெரிவிக்கின்றன.

அஜித் டோவால் விரைவில் கொழும்புக்கு வருவார் என்றும் தகவல்கள் கசிந்துள்ளன.