படலந்த ஆணைக்குழு Archives - Oruvan.com

படலந்த மற்றும் மாத்தளை தவிர வேறு சித்திரவதைக் கூடங்கள் இருந்தவனா?

Nishanthan Subramaniyam — Thu, 10 Apr 2025 05:51:13 +0000

நாடாளுமன்றத்தில் இன்று விவாதிக்கப்படும் நான்கு தசாப்தங்களுக்கு முன்னரான படலந்த சித்திரவதை முகாமைப் போலவே, ஏராளமான அரசு ஆதரவு சித்திரவதை மையங்கள் இலங்கையில் இருந்தன என்பதை உறுதிப்படுத்தும் சில தகவல்களை இலங்கையில் காணாமல் போனார் தொடர்பான ஜனாதிபதி ஆணைக்குழுக்களின் செயலாளர் பல தகவல்களை வெளியிட்டுள்ளார்.

ஜே.வி.பி.யின் இரண்டாவது கிளர்ச்சியின் போது காணாமல் போனவர்களை விசாரிக்க ஜனாதிபதி சந்திரிக்கா பண்டாரநாயக்க குமாரதுங்கவால் நியமிக்கப்பட்ட மத்திய வலைய ஆணைக்குழுவின் செயலாளர், சர்வதேச உண்மை மற்றும் நீதி திட்டம் (ITJP), இலங்கையில் ஜனநாயகத்திற்கான பத்திரிகையாளர்கள் (JDS) மற்றும் இலங்கை பிரச்சாரம் (SLC) ஆகியவற்றால் சமூக ஊடகங்களில் வெளியிடப்பட்ட காணொளிகள் மூலம் இந்த தகவல்களை வெளிப்படுத்தியுள்ளார்.

ஐந்து வருடங்களுக்கு முன்னர், இலங்கையில் 200ற்கும் மேற்பட்ட சித்திரவதைக் கூடங்களைக் காட்டும் முதல் வரைபடத்தை தொகுக்கப்பட்ட ITJP மற்றும் JDS வெளியிட்ட மாத்தளை சித்திரவதைக் கூடங்கள் மற்றும் காணாமல் போன சம்பவங்களில் கோட்டாபய ராஜபக்சவின் பங்கு குறித்து 2022 மற்றும் அதற்குப் பின்னர் வெளியிடப்பட்ட அறிக்கைகள் குறித்து விசாரணை செய்ய எந்த அரசாங்கமும் ஆர்வம் காட்டவில்லை. http://www.jdslanka.org/images/documents/18_06_2020_itjp_jds_press_release.pdf

தேர்தல் காலத்தில் படலந்த சித்திரவதைக் கூடம் குறித்து நாடாளுமன்ற விவாதத்தை நடத்த தற்போதைய அரசாங்கம் அவசரமாக ஆர்வம் காட்டுவதற்கு, முன்னாள் ஜனாதிபதி ரணில் விக்ரமசிங்கவிடம் அது குறித்து கேள்வி எழுப்பிய பின்னர் அல் ஜசீரா சர்வதேச ஊடக வலையமைப்பு ஏற்படுத்திய தாக்கமே காரணமாக அமைந்துள்ளது.

கடந்த தசாப்தத்தில் மாத்தளை, மன்னார், கொக்குத்தொடுவாய் மற்றும் கொழும்பு துறைமுகம் ஆகிய இடங்களில் பாரிய புதைகுழிகள் கண்டுபிடிக்கப்பட்டிருந்தாலும், இந்த விடயத்தில் நாடாளுமன்ற விவாதங்களை நடத்துவதற்கு எந்த அரசாங்கமும் முன்மொழியவில்லை.

1980களின் பிற்பகுதியில் நடந்த மனித உரிமை மீறல் குற்றங்களை விசாரணை செய்ய ஜனாதிபதி சந்திரிக்காவால் நிறுவப்பட்ட காணாமல் போனோர் தொடர்பான ஆணைக்குழுவின் மத்திய வலைய செயலாளர் எம்.சி.எம்.இக்பால் அண்மையில் அனைவரின் கவனத்தையும் ஈர்த்த படலந்த வெறும் ஒரு சித்திரவதை கூடம் என்பதை வெளிப்படுத்துகிறார்.

“ஆனால் படலந்த எனப்படுவது பாதுகாப்புப் படையினரால் நடத்தப்பட்ட பல தடுப்பு மையங்களில் ஒன்று அவ்வளவுதான். உதாரணமாக, கண்டியில் உள்ள புனித சில்வெஸ்டர் கல்லூரியிலும் ஒரு சித்திரவதைக் கூடம் இருந்தது.”

அந்த இடத்தில் தடுத்து வைக்கப்பட்டிருந்த தனது மற்ற தோழர்களைப் போல மரணத்தைப் பார்ப்பதற்குப் பதிலாக, தற்செயலாக தனது உயிரைக் காப்பாற்றப்பட்டதற்காக ‘சான்ஸ் காரயா’ என்ற புனைப்பெயரைப் பெற்ற ஒரு இளைஞன், காணாமல் போனோர் தொடர்பிலான மத்திய வலைய ஆணைக்குழுவிற்கு வழங்கிய சாட்சியத்திலிருந்து தான் இதைப் பற்றி அறிந்துகொண்டதாக இக்பால் குறிப்பிடுகின்றார்.

இக்பால் சொன்னதை கேட்க – https://x.com/JDSLanka/status/1909262030101422349

இது மீண்டுவர அனுமதிக்கப்படாத பல்லாயிரக்கணக்கானவர்களில் ஒருவரின் கதை மாத்திரமே.

இது பதுளையில் உள்ள ஹாலிஎல மோட்டர்ஸ் சித்திரவதை கூடம் பற்றிய கதை – https://x.com/SLcampaign/status/1909656056642306527?t=KG-1pG4p8rahfzRmlOWdAA&s=09

மத்திய வலைய ஆணைக்குழுவால் ஆவணப்படுத்தப்பட்ட வலிந்து காணாமல் ஆக்கப்பட்டவர்களின் முழு பட்டியலையும் இந்த இணைப்பில் அறிந்துகொள்ள முடியும். – http://tinyurl.com/2zyhxeek

The post படலந்த மற்றும் மாத்தளை தவிர வேறு சித்திரவதைக் கூடங்கள் இருந்தவனா? appeared first on Oruvan.com.

‘செப்டம்பர்’ அநுர அரசாங்கத்துக்கு சவாலானது – காரணம் என்ன?

Nishanthan Subramaniyam — Fri, 28 Mar 2025 05:52:54 +0000

இலங்கை அரசாங்கமோ அல்லது வேறு எவரும் எதிர்பார்க்காத வகையில் படலந்த அறிக்கை குறித்த தகவல் அல் ஜசீரா தொலைக்காட்சி விவாதத்தில் பகிரங்கப்படுத்தப்பட்டது. இதன் பின்னர் படலந்த ஆணைக்குழுவின் அறிக்கை நாட்டில் பிரதான பேசுபொருளானது.

அரசாங்கம் படலந்த ஆணைக்குழுவின் அறிக்கையை நாடாளுமன்றில் தாக்கல் செய்ததுடன், சர்வதேச சமூகம் இலங்கை தொடர்பாக சில நடவடிக்கைகளை எடுக்கக்கூடிய சூழலையும் உருவாக்கியுள்ளது.

படலந்த அறிக்கை ஊடாக வடக்கில் மட்டுமல்ல தெற்கிலும் கூட, மனித உரிமைகள் மீறப்பட்டுள்ளன என்பதையும் மக்கள் கடுமையான சித்திரவதைகள் மற்றும் படுகொலைகளுக்கு ஆளாகியுள்ளனர் என்பதையும் சர்வதேச சமூகத்திற்கு நிரூபிக்க வலுவான ஆதாரங்கள் கிடைத்துள்ளதாக அரசியல் ஆய்வாளர்கள் தெரிவிக்கின்றன.

2009 ஆம் ஆண்டு போர் வெற்றிக்குப் பின்னர், வடக்கில் உள்ள தமிழ் மக்களின் மனித உரிமைகள் போரினால் மீறப்பட்டுள்ளதாகக் கூறும் ஏராளமான முன்மொழிவுகள் ஜெனீவா மனித உரிமைகள் பேரவைக்கு வந்துள்ளன. ஆனால் இவற்றில் எந்தவொரு சந்தர்ப்பத்திலும் தெற்கில் உள்ள மக்களின் மனித உரிமைகள் மீறப்பட்டதாகக் கூறப்படவில்லை. ஆனால் படலந்த ஆணைக்குழுவின் அறிக்கையின் ஊடாக் இப்போது, அதற்கான பாதை திறக்கப்பட்டுள்ளதாக மனிதவுரிமை ஆர்வலர்கள் தெரிவிக்கின்றனர்.

அடுத்த செப்டம்பரில் நடைபெறும் ஜெனீவா மனித உரிமைகள் பேரவையின் அமர்வு இலங்கைக்கு மிகவும் முக்கியத்துவம் வாய்ந்ததாகவும் சவால் மிக்கதாகவும் இருக்கும் என கூறும் மனிதவுரிமை ஆர்வலர்கள், செப்டம்பரில் ஜெனீவா மனித உரிமைகள் ஆணையத்தில் இலங்கைக்கு எதிரான ஒரு வலுவான பிரேரணையும் முன்மொழியப்பட உள்ளதாகவும் கூறுகின்றனர்.

கடந்த ஆண்டு செப்டம்பரில் நடைபெற்ற மனித உரிமைகள் பேரவையின் கூட்டத்தொடரில் இந்தப் பிரேரணை ஏற்கனவே சமர்ப்பிக்க திட்டமிடப்பட்டிருந்தாலும், முன்னாள் ஜனாதிபதி ரணில் விக்ரமசிங்கவின் பதவிக்காலத்தின் இறுதி நாட்கள் மற்றும் தேர்தல் ஆண்டாக இருந்ததால் பிரேரணையை கடந்த அரசாங்கம் தள்ளிப்போட முடிந்தது. என்றாலும், இந்த ஆண்டு செப்டம்பரில் இந்த பிரேரணை உறுதியாக சமர்ப்பிக்கப்படும் என பிரேரணையை கொண்டுவரும் நாடுகள் புலம்பெயர் தமிழ் அமைப்புகளிடம் உறுதியளித்துள்ளன.

படலந்த அறிக்கையை மேற்கோள்காட்டி இலங்கை அரசாங்கம், தெற்கு மக்களின் மனித உரிமைகளையும் கடுமையாக மீறியுள்ளதாக கூறி மேற்கத்திய நாடுகள் இப்போது தொடர்புடைய முன்மொழிவை வலுப்படுத்தத் தயாராகி வருகின்றன. முன்னாள் ஜனாதிபதி ரணில் விக்ரமசிங்க அமைச்சராக இருந்தபோது படலந்த சம்பவத்தின் போது இந்த மனித உரிமை மீறல்கள் நடந்தன என்பதை நிரூபிக்க மேற்கு நாடுகள் தயாராகி வருகின்றன.

மேலும், விளக்கமறியலில் உள்ள முன்னாள் பொலிஸ்மா அதிபர் தேசபந்து தென்னகோன் தொடர்பான சம்பவம் இலங்கைக்கு மிகவும் எதிர்மறையான தாக்கத்தை ஏற்படுத்தும் என்று மனித உரிமை ஆர்வலர்கள் கருதுகின்றனர். தேசபந்து சம்பந்தப்பட்ட சம்பவத்தில் சட்டமா அதிபரின் சார்பாக ஆஜரான கூடுதல் சொலிசிட்டர் ஜெனரல் திலீப பீரிஸ், தேசபந்து தென்னகோன் ஒரு அதிகாரப்பூர்வமற்ற போர் குழுவை வழிநடத்தியதற்கான ஆதாரங்கள் சமர்ப்பிக்கப்பட்டுள்ளதாக நீதிமன்றத்தில் தெரிவித்திருந்தார். இந்த விடயமும் பல்வேறு தாக்கத்தை ஏற்படுத்தும் என எதிர்பார்க்கப்படுகிறது.

குறிப்பாக மேற்கத்திய நாடுகள் இதை ஜெனீவா குற்றச்சாட்டுகளில் ‘அரச பயங்கரவாதம்’ என்று கூறி சேர்க்க திட்டமிட்டுள்ளதாக தெரியவருகிறது. அதன்படி, நீண்ட காலமாக இலங்கையின் மனித உரிமை மீறல்களை அவதானித்துவரும் மேற்கு நாடுகளுக்கு இப்போது அரசாங்கம் இரண்டு எளிதான பிடிகளை வழங்கியுள்ளது. அல்லது, வடக்கில் நடந்ததாகக் கூறப்படும் மனித உரிமை மீறல்கள் குறித்த குற்றச்சாட்டுகளை நியாயப்படுத்த தெற்கில் இருந்து இரண்டு வாய்ப்புகள் வழங்கப்பட்டுள்ளன. அதன்படி, சர்வதேச அரசியலை பகுப்பாய்வு செய்யும் பலர், இந்த நிகழ்வுகளின் சங்கிலி தொடர் செப்டம்பரில் அரசாங்கத்திற்கு பாரிய சவாலாக இருக்கும் என்று நம்புகின்றனர்.

The post ‘செப்டம்பர்’ அநுர அரசாங்கத்துக்கு சவாலானது – காரணம் என்ன? appeared first on Oruvan.com.