தமிழ்நாடு சட்டமன்றத் தேர்தலுக்குப் பிந்தைய கருத்துக் கணிப்புகள் புதிய விவாதத்தை ஏற்படுத்தியுள்ளன. வழக்கமாக திமுக – அதிமுக என்ற இரு துருவ  அரசியல் போட்டி நிலவிய தமிழ்நாட்டில், இந்த முறை நடிகர் விஜயின் தமிழக வெற்றிக் கழகம் மூன்றாவது சக்தியாகக் களமிறங்கியது.

தேர்தல் பிரச்சாரங்களில் விஜயைக் காண மக்கள் பெருமளவில் திரண்ட காட்சிகள், மாநிலத்தில் அரசியல் மாற்றத்திற்கான எதிர்பார்ப்பை அதிகரித்தன.  குறிப்பாக இளைஞர்கள், முதன்முறையாக வாக்களிக்கத் தகுதி பெற்றோர் மற்றும் மாற்றத்தை விரும்பும்  மக்களிடையே தவெக மீது கணிசமான ஆர்வம் காணப்பட்டது.

ஆனால், தேர்தலுக்குப் பிந்தைய பெரும்பாலான கருத்துக் கணிப்புகள் அந்த வரவேற்பை முழுமையாகப் பிரதிபலிக்கவில்லை. பல கணிப்புகள் தவெக 10 முதல் 40 தொகுதிகள் வரையிலேயே வெற்றி பெறும் நிலையைக் காட்டுகின்றன. இதற்கு மாறாக, INDIA TODAY – AXIS MY INDIA கருத்துக் கணிப்பு மாத்திரம் விஜயின் கட்சி 98  முதல் 120 இடங்கள் கைப்பற்றி ஆட்சியமைக்கும் வாய்ப்பு உள்ளதாகக் கணித்துள்ளது.

இந்த முரண்பாடு பல கேள்விகளை எழுப்புகிறது. “பிரசாரங்களில் காணப்பட்ட மக்கள் கூட்டம் உண்மையாகவே வாக்குகளாக மாறியதா? ” “மேடைகளில் தெரிந்த ஆதரவு வாக்குச் சாவடிகளில் தொடர்ந்ததா? ” அல்லது  “அமைதியாகத் தீர்மானிக்கப்பட்ட வாக்காளர்களின் மனநிலையை சில கருத்துக் கணிப்புகள் சரியாகப் பதிவு செய்யத் தவறிவிட்டதா?” என்ற சந்தேகங்கள் தற்போது அரசியல் வட்டாரங்களில் பரவலாகப் பேசப்படுகின்றன.

பெரும் எதிர்பார்ப்புகளுக்கு மத்தியில் தமிழ்நாடு சட்டமன்றத் தேர்தல் கடந்த 23 ஆம் திகதி ஒரே கட்டமாக மொத்தமுள்ள 234  தொகுதிகளுக்கும் நடைபெற்றது.  தமிழ்நாட்டின் தேர்தல் வரலாற்றில் முதன்முறையாக 84.69% வாக்குகள் இம்முறை பதிவாகின.

இவ்வாறிருக்க தேர்தலுக்குப் பிந்தைய கருத்துக் கணிப்புகளில் NDTV- PEOPLE’S PULSE திமுக கூட்டணி 125 முதல் 145 தொகுதிகளும், அதிமுக கூட்டணி 65 முதல் 80  தொகுதிகளும் கைப்பற்றும் எனக் கூறப்பட்டுள்ளது. மேலும் தவெக 18 முதல் 24 தொகுதிகளையும் ஏனையவை 2 முதல் 6  இடங்களையும் கைப்பற்றும் எனத் தெரிவிக்கப்பட்டுள்ளது.

அதேபோன்று, திமுக கூட்டணி 125 முதல் 145 தொகுதிகள் வரைக் கைப்பற்றி மீண்டும் ஆட்சியமைக்கும் என REPUBLIC TV P MARQ கணித்துள்ளது.  அதிமுக கூட்டணி 65 முதல் 85 இடங்களையும், தவெக 16 முதல் 26 தொகுதிகளையும் கைப்பற்றும் எனவும், மற்றயவை 1 முதல் 6 இடங்களை பெறும் எனவும் கணித்துள்ளது.

MATRIZE நடத்தியக் கருத்துக் கணிப்பில் திமுக கூட்டணி 122 முதல் 132 தொகுதிகளும், அதிமுக கூட்டணி 87 முதல் 110 தொகுதிகளும் வெற்றி பெறும் எனக் கூறப்பட்டுள்ளது.  மேலும் தவெக 10 முதல் 12 தொகுதிகளிலும், மற்றயவை 1 முதல் 6 இடங்களிலும் வெற்றி பெறும் எனக் கணிக்கப்பட்டுள்ளது.

2026 சட்டமன்றத் தேர்தலில் தமிழ்நாட்டில் அதிமுக ஆட்சியைக் கைப்பற்றும் என Times Now JVC கணித்துள்ளது. அதன்படி அதிமுக கூட்டணி 128 முதல் 147 தொகுதிகளிலும்,  திமுக கூட்டணி 75 முதல் 95 தொகுதிகளிலும் வெற்றி பெறும் எனக் கூறப்பட்டுள்ளது. தவெக 8 முதல் 15 தொகுதிகள் கைப்பற்றும் எனத் தெரிவிக்கப்பட்டுள்ளது.

PEOPLE’S INSIGHT வெளியிட்டுள்ள கருத்துக் கணிப்பில் திமுக கூட்டணி 120 முதல் 140 இடங்களைக் கைப்பற்றி ஆட்சியைத் தக்கவைக்கும் எனத்  தெரிவிக்கப்பட்டுள்ளது. அதேநேரம் அதிமுக கூட்டணி 60 முதல் 70 தொகுதிகளிலும், தவெக 30 முதல் 40 இடங்களிலும் வெற்றி பெறும் எனக் கூறப்பட்டுள்ளது. மற்றயவை அதிகபட்சம் 4 இடங்களில் வெற்றி பெறும் எனத் தெரிவிக்கப்பட்டுள்ளது. மேலும், INDIA TODAY AXIS MY INDIA கருத்துக் கணிப்பில், நடிகர் விஜயின் தமிழக வெற்றிக் கழகம் 98 முதல் 120 இடங்களை கைப்பற்றி  தமிழ்நாட்டில் ஆட்சி அமைக்கும் எனக் கூறப்பட்டுள்ளது.

திமுக கூட்டணி 92 முதல் 110 இடங்களையும், அதிமுக கூட்டணி 22 முதல் 32 தொகுதிகளையும் கைப்பற்றும் எனக் கணித்துள்ளது. அதேநேரம் திமுக மற்றும் தவெக ஒருசேர 35 சதவீத வாக்குகளைப் பெறும் என AXIS MY INDIA கணித்துள்ளது. Chanakya Strategies கருத்துக் கணிப்பில் திமுக கூட்டணி 145 முதல் 160 இடங்களையும், அதிமுக கூட்டணி 50 முதல் 65 தொகுதிகளையும்  கைப்பற்றும் எனக் கணிக்கப்பட்டுள்ளது.  தவெக 13 முதல் 18 இடங்களிலும், மற்றயவை 5 முதல் 8 இடங்களிலும் வெற்றி பெறும் எனக் கூறப்பட்டுள்ளது.

அக்னி வெளியிட்டுள்ள கருத்துக் கணிப்பு முடிவுகளில், திமுக கூட்டணி 169 தொகுதிகளிலும் அதிமுக கூட்டணி 64 தொகுதிகளிலும்  தவெக ஒரு தொகுதியிலும் வெற்றி பெறக்கூடும் என்று தெரிவிக்கப்பட்டுள்ளது.  VOTE VIBE நடத்திய கருத்துக் கணிப்பில் அதிமுக கூட்டணி 124 தொகுதிகள் வரை வெற்றி பெற வாய்ப்புள்ளதாகத் தெரிவிக்கப்பட்டுள்ளது.

திமுக கூட்டணி 103 முதல் 113 தொகுதிகளும், தவெக 10 தொகுதிகளும் வெற்றி பெறும் என்றும் VOTE VIBE கணித்துள்ளது. வாக்கு சதவீதத்தைப் பொறுத்தவரை அதிமுக கூட்டணி 39.9 சதவீதமும் திமுக கூட்டணி 38.9 சதவீதமும்  தவெக 15.8 சதவீதமும் பெறும் எனத் தெரிவித்துள்ளது.

அதேபோன்று, சீமான் தலைமையிலான நாம் தமிழர் கட்சி குறித்த கணிப்புகள் ஒப்பீட்டளவில் குறைவாகவே உள்ளன. சீமான் தலைமையிலான நாம் தமிழர் கட்சிக்கு கிராமப்புறங்களில்  ஓரளவு செல்வாக்கு உள்ளதாக கணிக்கப்பட்டுள்ளது. நாம் தமிழர் கட்சி அதிகபட்சமாக 0 முதல் 6 இடங்கள் வரை மட்டுமே பெற வாய்ப்பு  உள்ளதாக கருத்துக் கணிப்புகள் தெரிவிக்கின்றன.

தமிழ்நாட்டில் எந்தவொரு கட்சிக்கும் குறைந்தது 118 இடங்கள் கிடைக்கவில்லை என்றால், அது தொங்கு சட்டமன்றமாக அமையும் என்பதையே கருத்துக் கணிப்புகள் காட்டுகின்றன. அவ்வாறான சூழலில், சிறிய கட்சிகளின் ஆதரவுடன் கூட்டணி ஆட்சி அமையவே அதிக வாய்ப்புள்ளதாகவும் ஆய்வாளர்கள் கூறுகின்றனர்.

கருணாநிதி – ஜெயலலிதா காலத்திற்குப் பிறகு உருவான அரசியல் வெற்றிடத்தை நிரப்பும் இரண்டாவது சட்டமன்றத் தேர்தலாக இது அமைந்துள்ள நிலையில், இந்த முறை மக்களின் தீர்ப்பு எந்தத் திசையில் செல்லும் என்பது அரசியல் வட்டாரங்களில் பெரும் ஆர்வத்தையும் எதிர்பார்ப்பையும் ஏற்படுத்தியுள்ளது.

தமிழ்நாடு தேர்தல் அரசியலில் மக்கள் கூட்டம், சமூக ஊடகத் தாக்கம், நட்சத்திரக் கவர்ச்சி ஆகியவை வெற்றிக்கான ஒரே அளவுகோலாக இருக்க  முடியாது என்பதையும், அதேவேளை பாரம்பரியக் கணக்கீடுகள் புதிய அரசியல் அலைகளை முழுமையாகப் புரிந்துகொள்ள முடியாமல் போகலாம் என்பதையும் இந்த தேர்தல் நினைவூட்டுகிறது. விஜயின் தவெக உண்மையில் “அமைதியான அரசியல் எழுச்சியை உருவாக்கியுள்ளதா?” அல்லது “அது வெறும் பிரச்சார வெப்பமா? என்பது வாக்கு எண்ணிக்கையிலேயே தெளிவாகும்.

எதுவாக இருந்தாலும், இந்தத் தேர்தல் தமிழ்நாட்டில் இரு கட்சி ஆதிக்க அரசியலை சவாலுக்கு உட்படுத்தியத் தேர்தலாகவும், விஜயின் அரசியல்  வருகை கணிப்புகளையும் கணக்குகளையும் குழப்பிய தேர்தலாகவும் வரலாற்றில் பதிவாகும்.

மாற்றம் ஏற்படுமா? அல்லது “தற்போதைய ஆட்சி தொடருமா?“  என்ற இறுதி கேள்விக்கான பதில் மே 4 ஆம் திகதி தெரியவரும்.

The post தமிழகத்தை ஆளப்போவது யார்? கணிப்புகள் காட்டும் திருப்பம் – மே 04   ஐ நோக்கிய மக்களின் பார்வை appeared first on Oruvan.com.

சட்டமன்றத் தேர்தலுக்கான பிரச்சாரம் இன்றுடன் தமிழகத்தில் நிறைவடையும் நிலையில், வாக்கு கோரி தமிழக வெற்றிக் கழக தலைவர் விஜய் கடிதம் எழுதியுள்ளார்.

அந்தக் கடிதத்தில் தெரிவித்திருப்பதாவது,

“ஆசையோடும் அன்போடும் எனக்காக எல்லாவற்றையும் அள்ளி அள்ளித் தந்த உங்களோடு உங்கள் விஜய் மனம்விட்டுப் பேசவே இக்கடிதம். எனக்கு எல்லாமும் தந்த என் சொந்தங்களான தமிழ்நாட்டு மக்களுக்கு நன்றிக்கடன் செலுத்தவே அரசியலுக்கு வந்த நாள்முதல் சொல்லொணா நெருக்கடிகளையும் நிர்பந்தங்களையும் சொல்லவியலா வேதனைகளையும் இதுவரை நமக்கு விளைவித்தே வந்தவர்கள் வேறு யார்?

நமது அரசியல் எதிரியான மக்கள் விரோத தீயசக்தி திமுகவும் கொள்கை எதிரியான மற்றும் பலருடன் களம் காணும் பிளவுவாத சக்தியான பாஜகவும் என்று மக்களே அறிவர். மக்களுக்காக அவர்தம் நலன்களுக்காக மட்டுமே அரசியலுக்கு வந்த இந்த விஜய், பாசிச மனநிலை கொண்ட ஜனவிரோதக் கட்சிகளின் அழுத்தங்களுக்கா அடிபணிவான்? திசைதிருப்பல் முதலீட்டுக் கழகங்களின் நெருக்கடிகளுக்கும் நிர்பந்தங்களுக்கும் குனிந்து கூழைக் கும்பிடா போடுவான்? ஆதாயங்களைக் காட்டி உங்கள் மகனை அடக்கிவிடவும் முடியாது. அதிகாரங்களை ஏவி உங்கள் சகோதரனை மிரட்டி விடவும் இயலாது.

இறைவன் அருளால் இயற்கையின் துணையுடன் மாபெரும் பெண்கள் சக்தி, மாபெரும் இளைஞர் சக்தி, மாபெரும் மக்கள் சக்தியுடன் உலகெங்கும் உள்ள நமது தோழர்களின் பேராதரவுடன் முதன்மை அரசியல் சக்தியாகக் களத்திற்கு வந்திருக்கும் தமிழக வெற்றிக் கழகத்தின் தமிழக மக்கள் நலன் சார்ந்த நோக்கத்தையும் அதன் தாக்கத்தையும் எந்தக் கொம்பனாலும் அசைக்க முடியாது என்பதை வரும் தேர்தலில் நம் மக்களே அவர்களுக்கு சரியான பாடம் புகட்டி உணர்த்துவர்.

நம்மை எள்ளி நகையாடியக் கூட்டம் மட்டுமன்று, இந்த நாடே அறியும்,அளக்கமுடியாத ஆழ்கடல் – விலக்க முடியாத விரிவானம் த.வெ.க என்று.நேர்மையின் நெருப்புக்கோளம் – மக்களின் நெஞ்சில் நீக்கமறக் குடியிருப்பது த.வெ.க என்று. சமூகநீதிக் காவலரண் – ஜனநாயகப் பேரரண் த.வெ.க என்று.

இப்படிப்பட்ட த.வெ.கவை ஊழல் விஷ சக்திகளாலா வீழ்த்த முடியும்? பாசிச சக்திகளாலா பகைவெல்ல முடியும்? மக்களே… மீண்டும் சொல்கிறேன். இத்தனை நெருக்கடிகளையும் இத்தனை நிர்பந்தங்களையும் இத்தனை வேதனைகளையும் உங்கள் விஜய் தாங்கிக்கொண்டு நிற்க ஒரே ஒரு காரணம்தான் உண்டு. அது உங்களின் உயர்தனி உள்ளன்பு மட்டும்தான்.

எந்த அரசியல் கட்சி முன்புலமோ பின்புலமோ இன்றி அரசியலுக்கு வந்த என்னை ‘நீ வாப்பா’… ‘நீ வா தம்பி’… ‘நீ வாண்ணா’… ‘நீ வா நண்பா’… ‘நீ வா தோழா’… ‘நாங்க பாத்துக்கறோம்’… என்ற உங்களின் பேரன்பும் பேராதரவும் மட்டுமே என்னை இயக்கும் மாபெரும் உந்துசக்தி என்பதே உண்மை.
இப்போதும் சொல்வேன். எப்போதும் சொல்வேன். உங்களையும் என்னையும் இந்த உலகத்தில் எந்த அதிகார சக்தியாலும் எந்த அராஜக சக்தியாலும் எந்த தீயசக்தியாலும் எந்த பாசிச சக்தியாலும் எந்த ‘மற்றும் பலர்’ சக்தியாலும் பிரிக்கவே இயலாது.

அப்படிப் பிரிக்க நினைக்கும் அனைத்து சக்திகளையும் மக்கள் அக்குவேறு ஆணிவேறாகத் தனித்தனியாகப் பிரித்து, தூக்கி வீசி எறியப் போவது உறுதி. பணத்தை மட்டுமே நம்பி தத்தம் சுயலாபங்களுக்காக அரசியல் களமாடும், எதிர்வரும் நம் தலைமுறையின் கனவுகளை அடகு வைக்கத் துடிக்கும் அடிமை அரசியல் சூதாடிகளின் வேறு எந்தச் சின்னத்திற்கு நீங்கள் வாக்களித்தாலும், பிளவுவாத சக்திகளுக்கான மறைமுக அல்லது நேரடி ஆதரவாக மட்டுமே அது மாறும்.” என்று கூறி தவெகவுக்கு வாக்கு கோரியுள்ளார்.

The post மக்களின் நலன்களுக்காக மட்டுமே அரசியலுக்கு வந்துள்ளேன் – விஜய் appeared first on Oruvan.com.