கடந்த செவ்வாயன்று வெள்ளை மாளிகையில் ஜெர்மன் ஜனாதிபதி பிரீட்ரிக் மெர்ஸ் உடன் செய்தியாளர்களைச் சந்தித்த ஜனாதிபதி டொனால்ட் டிரம்ப், இந்தப் போரினால் அமெரிக்காவில் எண்ணெய் விலையேற்றம் ஏற்படும் என்பதை முதன்முறையாக ஒப்புக்கொண்டுள்ளதாக கூறியுள்ளார்.

ஈராக் போருக்குப் பிறகு அமெரிக்கா எடுத்துள்ள மிகப்பெரிய இராணுவ நடவடிக்கை இது என்பதால், இதன் தாக்கம் உலகப் பொருளாதாரத்திலும் பங்குச்சந்தையிலும் பெரும் அதிர்வுகளை ஏற்படுத்தியுள்ளது.

ஜனாதிபதி டிரம்ப் இந்த விலையேற்றத்தைத் தற்காலிகமானது என்று நியாயப்படுத்தினாலும், கள யதார்த்தம் வேறாக இருக்கிறது. fடந்த சனிக்கிழமை தொடங்கிய இந்தத் தாக்குதலுக்குப் பிறகு கச்சா எண்ணெய் விலை 10 சதவீதம் உயர்ந்துள்ளதுடன், பெட்ரோல் விலையும் கணிசமாக அதிகரித்துள்ளது.

பாரசீக வளைகுடா ஒரு போர் மண்டலமாக மாறியுள்ள நிலையில், எண்ணெய் டாங்கர்களுக்குப் பாதுகாப்பு அளிப்பதாக டிரம்ப் உறுதியளித்திருப்பது நிலைமையின் தீவிரத்தைக் காட்டுகிறது.

இந்தப் போருக்கான காரணங்கள் குறித்து டிரம்ப் நிர்வாகம் முன்னுக்குப் பின் முரணான விளக்கங்களை அளித்து வருவது சர்வதேச சமூகத்திடையே பெரும் குழப்பத்தை ஏற்படுத்தியுள்ளது.

ஈரானின் அணு ஆயுதத் திட்டத்தைத் தடுத்த நிறுத்தவே இந்தத் தாக்குதல் என்று ஒருபுறம் கூறப்பட்டாலும், ஈரானிய பேச்சுவார்த்தையாளர்கள் நேர்மையாகச் செயல்படவில்லை என்ற காரணமும் முன்வைக்கப்படுகிறது.

குறிப்பாக, இஸ்ரேல் தாக்கவிருந்ததால் அமெரிக்கா முந்திக்கொண்டது என்ற வெளியுறவுத் துறை அமைச்சர் மார்கோ ரூபியோவின் கருத்தை டிரம்ப் மறுத்துள்ளார். மாறாக, ஈரான் முதலில் தாக்கக்கூடும் என்ற தனது தனிப்பட்ட கணிப்பின் அடிப்படையிலேயே இந்த முடிவை எடுத்ததாக அவர் கூறியுள்ளார்.

வெனிசுலாவில் ஜனாதிபதி மதுரோவைக் கைப்பற்றியது போன்ற ஒரு “துல்லியமான நடவடிக்கை”யாக இது இருக்கும் என்று டிரம்ப் நம்பினாலும், ஈரானின் தற்போதைய சூழல் மிகவும் சிக்கலானது.

ஈரானின் எதிர்காலத் தலைமை குறித்து அமெரிக்காவிடம் தெளிவான திட்டம் இல்லை என்பதை ஜெர்மன் ஜனாதிபதி மெர்ஸ் சுட்டிக்காட்டியுள்ளது கவனிக்கத்தக்கது.

ஒரு ஆட்சியைக் கவிழ்த்த பிறகு, அங்கு நிலையான ஒரு மாற்றைக் கொண்டு வராமல் இருப்பது மீண்டும் பழைய நிலைக்கே அந்த நாட்டை இட்டுச்செல்லும் என்ற அச்சம் ஐரோப்பிய நாடுகளிடையே நிலவுகிறது.

மறுபுறம், போரின் தீவிரம் காரணமாக மத்திய கிழக்கிலிருந்து ஆயிரக்கணக்கான அமெரிக்கக் குடிமக்கள் வெளியேறி வருகின்றனர். இவ்வளவு பெரிய ராணுவ நடவடிக்கையை எடுப்பதற்கு முன்னரே முறையான பாதுகாப்பு எச்சரிக்கைகளை விடுக்காதது குறித்து எதிர்க்கட்சியான ஜனநாயகக் கட்சியினர் கேள்வி எழுப்பியுள்ளனர்.

வரவிருக்கும் இடைத்தேர்தலில் இந்த விலையேற்றமும், போரின் பாதிப்புகளும் டிரம்பிற்குப் பெரும் சவாலாக அமையும் என்பதில் சந்தேகமில்லை.

The post டிரம்பின் பொருளாதார சவாலும் புவிசார் அரசியல் நெருக்கடியும் appeared first on Oruvan.com.